【過冬放工行工展會】
碧姐：「各位同事早晨！今日喺冬至，原本通告出咗4:00鐘早放……剛才趙總話：『若果同事想再早啲返屋企準備，取消午飯時間就可直接3:00鐘放工……』，所以各位需要放午飯嘅，出入照打咭，然後4:00鐘打放工嗰次咭；若果想最早放人嘅，直接3:00打咭放工就可以啦！」
畢哥：「咁正！3:00鐘就走得！反正今朝早餐食得晏，都未肚餓……一於直踩，放3:00正！喂！楚丁，妳今年行咗工展會未？」
楚丁：「未呀畢哥！晚晚都加班，邊有時間去呀？」
畢哥：「咁就啱啦！不如一齊3:00鐘放工，過去工展會行下，順便買啲禮物，應下節，今晚攞返屋企送俾阿媽……扮下乖仔先！一齊去吖楚丁！」
【加班的楚丁】
楚丁：「提意就真係好！我都諗咗幾日：仲未買禮物俾人……只可惜……」
畢哥：「只可惜咩？妳唔通用晒份糧！冇錢買禮物？」
楚丁：「梗喺唔喺啦！我年尾好多嘢未做晒……成日加班，邊有機會去買啫？」
畢哥：「今晚冬至喎！仲加班？」
楚丁：「係呀！鬼叫過兩日又聖誕咩！喺自己嘅範圍，遲做！早做！咪又喺自己做返！」
【蛇王的畢哥】
畢哥：「妳咁樣諗，再加埋身體力行……搞到我好內疚咁添！」
楚丁：「你又喺過份咗啲㗎！遲到、早退、下午茶見完客就唔返公司……又成日話work from home (WFH) ……好彩你交到數咋！如果唔喺……」
畢哥：「如果唔喺炒咗我吖嘛！我梗喺明白呢嗰定律！不過，有時擺明無客、無嘢做……唔通喺到扮做嘢咩？我就做唔出啦！」
【碧姐點睇？】
碧姐：「阿畢！我聽到晒啦！楚丁講得啱，你個記錄就真喺花咗啲！你知唔知，好多時，交報告上去之前，我喺要喺旁邊加簽……有時趙總問起，我要幫你解釋㗎！」
畢哥：「咁就真喺唔知喎！我成日以為喺做行政嘅碧姐捉我蛇，我冇諗過喺碧姐妳幫我解釋囉！」
【趙總點睇？】
趙總：「阿畢，今日過節好日子，大家又傾得興起……等我入埋嚟一齊傾下啦，好嗎？」
眾人齊聲：「早晨趙總！」
趙總：「阿碧喺管行政嘅，佢將大家嘅考勤整理好，依書直說，反映俾上面知，喺佢嘅天職！大家千祈唔好嬲阿碧！」
碧姐：「趙總，呢啲喺我嘅份內事，嬲唔嬲唔喺我考慮嘅範圍，有冇反映事實？反映得啱定錯？……先至喺我嘅責任！至於管理層點樣做決定？呢啲就唔喺我負責啦！」
趙總：「我真喺越嚟越欣賞阿碧！恰到好處！大家真喺要向阿碧學下嘢！」
碧姐：「唔敢當！好多嘢都喺跟趙總學……趙總，剛才佢地傾緊『加班』同埋『冇嘢做唔想扮勤力』；不如，你分享一下你嗰啲『MBO』俾大家聽下……」
趙總：「哈！哈！『冇嘢做唔想扮勤力』幾好聽喎！不過，呢句嘢嘅潛台詞咪即喺『想蛇王』囉！」
畢哥：「趙總，咩叫MBO[1]呀！MBA[2]同NBA[3]我都識！但喺從未聽過MBO……」
趙總：「阿畢醒目仔即喺醒目仔！知我話佢即刻轉話題……仲要扮到好好學咁！MBO呢……」
【下期待續】
【註1】Management by Objective (MBO) 以目標果效為管理手段，傾向以目標為本，過程則比較彈性
【註2】Master of Business Administration (MBA) 工商管理碩士，很多管理階層都曾修讀類似課程，旨在把來自各種不同專業的新晉管理達人，都要確保有相應的企業管理根基
【註3】National Basketball Association (NBA) 美國國家籃球協會
《EC職場周記》角色介紹
本劇主要圍繞4位主角，分別是兩男兩女。
趙達標：總經理。任務導向，人緣方面就……
崔畢源：銷售經理。開朗樂天，講就天下無敵……
歸楚丁：初級文員。任勞任怨，平易近人……
沈碧堅：行政主管。有原則，要求甚高……