EC職場周記—打工仔的新年願望

【新年順便放AL】

畢哥：「楚丁！新年快樂喎！」

楚丁：「大家咁話啦畢哥！你就好啦，連續放幾日假，今朝先至返工……呢兩日，都有一啲客打嚟搵你……」

畢哥：「吓！咁妳唔通知我嘅？」

楚丁：「放心！我有問佢哋搵你有冇急事？若果有特別情況，我會知會崔經理(畢哥) ……點知佢哋唔單止醒目、仲好客氣添……佢哋話：『冇乜特別！只不過喺收到崔經理寄嚟嘅禮物，或者賀咭，特登致電多謝……若崔經理休假中，都儘量不要打攪佢啦……』」

畢哥：「啊！咁就冇乜所謂啦……」

楚丁：「畢哥，我真喺好羨慕你！啲客對你咁好！而你又工作效率勁高！平時就遲到早退，新年又乘機清吓年假……人唔喺公司，但喺，安排俾客嘅禮物全部都井井有條……跟客戶嘅關係簡直就喺7x24【註１】！最重要：啲客唔想打搞你老人家放假！邊有咁嘅客戶關係，攪到好似你喺客，佢哋喺供應商咁！調轉咗！」

畢哥：「呢嗰喺我一年前嘅『新年願望』……」

楚丁：「一年前嘅『新年願望』？具體喺咩嚟㗎？講嚟聽吓！」

【打工仔的新年願望】

畢哥：「2020年年尾，退修活動時，趙總同碧姐咪搵咗個企業教練幫大家做培訓嘅……妳記唔記得？」

楚丁：「記得！講身心靈嗰位吖嘛……係咪？」

畢哥：「係啦！上完佢嘅培訓堂，我俾佢一言驚醒！諗通咗：原來願望唔一定喺物質方面嘅！簡單嚟講：『唔理咩嘢願望，只要兼顧身、心、靈……要造福到他人，但要切記……」

楚丁：「吓！自己嘅願望要造福他人？咁搵笨嘅！」

畢哥：「妳冇聽過 win-win【註2】咩？」

楚丁：「有！但喺依家講緊自己嘅新年願望嘛……」

畢哥：「無錯！呢嗰喺另一個重中之重嘅重點：想自己開心，願望一定要『自力可成』，若果願望要依靠他人才能夠實踐，咁最終，極有機會失望而回，換句話講：『願望落空，淪為失望』！」

楚丁：「好深呀！可唔可以解釋一吓，然後再舉啲例子……？」

【滿足vs開心】

畢哥：「無論願望涉及物品、活動、感受……，簡單嚟講：最終都會轉化成為『開心』！有啲人會要求先『滿足』，然後就會『開心』！妳同意嗎？」

楚丁：「諗諗先：想買手機，算喺物品，擁有咗，就會『滿足』！『滿足』到，就會『開心』！係咪咁樣？」

畢哥：「係喇！就喺咁樣！」

楚丁：「想去主題公園，算喺活動，去咗，就會『滿足』？『滿足』完，又會『開心』？係咪咁樣？」

畢哥：「妳話呢？喺咪好似差些少嘢咁樣？」

楚丁：「係呀！開頭好似好簡單……諗多一步，諗諗下就好似差啲嘢咁樣！」

畢哥：「差咗嗰樣叫做：『人』！通常，我哋人類係要跟他人分享，先至會開心！有靚衫著，自己靚，冇人睇！冇人讚！點開心都會扣咗分……活動方面更甚，正如妳所講『去主題公園』，自己去，或者去完，影咗相，但冇人同妳分享……又點能夠盡興呢？」

【身心靈兼顧】

楚丁：「嘩！畢哥，你變咗哲學高手咁喎？咁『身心靈』方面又點呀？係咪為咗『身心靈』，各自諗一個願望，然後再逐一跟有關嘅人分享咁呀？」

畢哥：「咁又唔洗咁複雜！基本上，『物品』都同『身』有關，全部都食得到，摸得到，會產生肉體上『爽』嘅感受；至於『活動』同『滿足』，好多時都會產生『開心』，顧名思義，呢嗰就喺『心』啦！最後，其實能夠跟人分享，或者直接幫到人，根據利他主義 (Altruism) ，完成後嗰種『靈性』上的滿足，就根本唔能夠用物質來衡量啦！」

楚丁：「嘩！出到利他主義，估你唔到囉！不過，我明白晒你舊年嘅願望啦！」

畢哥：「咁醒！講嚟聽吓……」

楚丁：「你買西裝、添置電腦設備……準備在家工作(Work From Home, WFH) ，最直接，身體上既可以貪靚、又可以貪快、貪方便、WFH仲可以瞓晏啲，益晒你嗰『身』！」

畢哥：「醒！有慧根，繼續……」

楚丁：「咁你對自己嗰『身』咁好，爽到不得了，『滿足』晒，嗰『心』自然會開啦！喺咪？」

畢哥：「掂！最後一站，繼續……」

楚丁：「你喺公司嘅崗位雖然做銷售，但你處處以解決客戶嘅困難而出發，當你呢啲願望實踐成功，咁亦即喺客戶嘅問題解決咗！呢嗰絕對喺『雙贏』！幫到人，錢又搵到，身心舒暢之餘，嗰『靈』自然飽足晒！」

畢哥：「叻！就喺咁樣！」

楚丁：「畢哥，我仲有一個問題！」

畢哥：「楚丁，新嘅一年，妳變咗『問題少女』喎！唔緊要，我盡量滿足妳……」

楚丁：「剛才喺舊年嘅願望，咁2022年呢？」

畢哥：「問得好！我早幾日放假，都不停喺到問自己呢個問題……我諗加多一項：『疫情快啲落，願望早著落！』