EC職場周記—疫苗護照？逆妙護照？

【由歲首到年終】

碧姐：「喂！阿畢……你喺邊到呀？睇告示版又唔見你講低要見客。星期三要交嗰份年終報告，你又話今朝交……依家11:30am，你又唔見人？報告又唔覺有？你有咩嘢計劃呀？」

畢哥：「碧姐早晨！噚晚同客飯局，飲多咗幾杯，今朝唔知醒……好彩妳打嚟！吓！11:30am啦！我依家搭飛機返嚟！份報告……差些少，我返到嚟，執執佢就得！今日放工前交俾妳！我promised再加擔保！放心碧姐！」

碧姐：「唉！楚丁，點解你哋兩個喺同學，讀同一個課程，同期畢業，同期加入我哋公司……但喺兩個人做嘢嘅風格差咁遠㗎？」

楚丁：「碧姐息怒！喺囉！妳都話：『兩個人』嚟嘛！做嘢風格就梗係唔同啦！再者，我有好多嘢都比唔上畢哥……」

碧姐：「唉！一個就『擔屎唔偷食』：送埋咀邊都唔識食；一個就『甩繩馬騮』：睇少眼都偷雞……由年頭話到年尾，兩嗰都死性不改！」

楚丁：「碧姐，知道呀！好多謝妳呀！經常苦口婆心，由『歲首都年終』都睇住我哋，大家好唔容易先至挨得過呢個疫情嘅2021年……」

【疫苗護照】

畢哥：「楚丁，我返咗嚟啦！今朝碧姐咩嘢環境？我爛瞓……又唔知醒！衰咗！」

楚丁：「冇嘢嘅！大家都慣咗㗎啦！係呢，碧姐話你跟啲客應酬，飲多咗喎！冇咩嘢吖嘛？」

畢哥：「我就冇乜嘢！不過班做廠嘅客就好唔開心囉！嗰嗰都冇得返大陸見屋企人……早前出嚟就講唔想打針！後來慢慢就轉咗講『安心出行』……到依家，打咗針！又裝咗『安心出行』，出到嚟就講『疫苗護照』同埋幾時『通關』？」

楚丁：「畢哥，聽吓聽吓……唔知以為你係區議員？又或者係『輔導員』？咁關注啲街坊同埋啲貼近民生嘅題目……」

畢哥：「其實做sales，根本上都係幫人解決問題！急客人所急，疏導吓客人嘅情緒……我做唔出：有單先出嚟見客！有時，跟客人保持好嘅關係，就好似朋友咁樣！就算明知無生意，客人叫到，我都盡量配合吓……呢個係我做sales嘅座佑銘！」

【逆妙護照】

楚丁：「幾好吖畢哥！你心地好！夠貼地！又樂意付出……所以班客有生意就一定諗起你！如果唔係，早排趙總又點會主動升你職啫！你唔洗擔心喎！你喺公司嘅位置穩如磐石喎！」

畢哥：「喺啫！之不過……我真喺有好多蝦碌位……就好似今朝唔知醒咁樣！不過，聽妳剛才嗰翻話，我除咗放鬆咗好多之外，我仲諗返起一啲嘢……」

楚丁：「放鬆返咪好囉！頭先，我都發現你一路聽，原本皺埋嘅眉頭一路解；一邊聽，兩隻拳頭一邊放開……」

畢哥一邊垂頭望望雙手，一邊說：「係喎！真係唔講唔覺！兩隻手都張開晒！」

楚丁：「畢哥你仲諗返起啲乜嘢呀？」

畢哥：「我記得上NLP培訓嘅時候，導師教過一招叫做：『換框法』，佢話當有一啲唔開心嘅事煩擾住，大部份人都會用『因為……所以……』去諗，咁樣，只會越諗越唔開心！相反，若果轉用：『雖然……但是……』，情況就會剛好相反！剛才，妳唔覺意用咗『換框法』幫我，所以我一路帶著趕返嚟公司嘅情緒，就即刻消退晒！多謝妳呀楚丁！」

楚丁：「你唔講，我都唔識乜嘢叫做『換框法』，或者，喺你自己天生嘅『疫苗護照』幫你自己啫！應該唔關我事囉！」

畢哥：「咩嘢『疫苗護照』呀？」

楚丁：「唔喺『疫苗護照』！你又唔洗返大陸，你喺咪酒氣未過？仲未醒呀？我喺話『逆妙護照』呀！」

畢哥：「咩嘢『逆妙護照』呀？我都喺唔明添！」

楚丁：「你剛才講嗰個『換框法』，咪將啲逆境中嘅事，巧妙地轉化成正面嘅因由，將成嗰人保護著，推走晒啲烏雲，俾啲陽光照返入嚟……咁上下囉！」