EC職場周記—相同的逆境，不一樣地領受 (上)

【相同的逆境】

楚丁：「早晨呀碧姐！剛剛收到呢張傳真，唔知係咪緊急？但直覺話俾我聽係『特別』嘅，所以攞過嚟俾妳睇下先……」

碧姐：「咦！樟記竟然結業！嘩！樟記在行內差唔多四十年，舉足輕重，係老字號喎！」

畢哥：「咩話？樟記？係咪我舊年接手，係柴灣嗰間父子檔，兩代同堂既樟記？」

碧姐：「係呀！咪大張同細張父子檔嗰間樟記囉！」

【不一樣地領受】

楚丁：「我印象中，我哋同樟記個檔案都好厚，都好多生意往來咁喎！」

碧姐：「係呀！當年大張全靠我哋做供應商，俾唔少數期撐佢哋，終於捱過咗03年沙士，之後咪彈起咗……無幾耐，細張係外國留學返來，返公司幫老竇，兩代合作，一攻一守，生意愈做愈好……」

楚丁：「聽落幾好喎！咁點解會結業嘅？好可惜喎！」

畢哥：「咪係囉！呢個客，由接手嗰日開始，我知道佢哋實力夠，我諗住執到支好籤，一路都花唔少時間同心機去煲……尤其是細張，我諗住佢係準掌門人，我成日同佢研究波衫，投其所好……諗住接多啲生意之餘，大細張仲會介紹多啲客俾我……唉！呢次嘥晒啲心機，捱錯咗眼瞓添！」

碧姐：「一早話咗你㗎啦！淨係睇表面，憑感覺……樟記自從細張回巢，採用新派管理手法，樟記基本上落單分得好散！數期又儘量用到我地盡晒，經常搵我哋報價，開發新產品……最終都係嗰句。」

楚丁：「我知！我知！搞搞震，冇幫襯！畢哥呢次仲唔係：為樟跑，為張忙；嗰客執笠變躁狂！」

畢哥：「幾時有躁狂呀？不過有啲失望咁啫……」

趙總：「邊嗰躁狂？邊嗰失望？」

當大家都把事件向趙總陳述後，他竟然......

【商場如戰場】

趙總：「咁就太好啦！」

楚丁(竊竊私語) ：「畢哥，趙總咁涼薄㗎！大張過咗身，細張生辦完爸爸身後事，無心戀戰，把公司結束，然後移民，離開呢個傷心地……趙總竟然話：『太好啦！』」

畢哥(竊竊私語) ：「雖然我都唔明！但據我對趙總嘅理解，佢應該唔係妳諗嗰種……」

趙總：「我嗰仔學校啱啱有個講座，係坊間嗰間《小麥文化》【註】搞嘅，嗰題目係『從性格分析看疫情和逆境下如何面對壓力』，我聽落覺得好特別，好啱大家，仲特登攞咗阿仔份資料，啱啱諗住攞出嚟同大家分享下……點知聽到樟記呢個消息！」

碧姐：「趙總，你係咪諗緊我哋個對手……」

趙總：「啱啦！都係阿碧醒目！樟記長期搵我哋笨，叫我哋做開荒牛，差唔多成熟嘅時候，就攞晒啲靈感去幫襯我地對手SP……今次大張過身，我梗係唔開心！話晒都合作咗咁耐，細張唔做，唔係離開傷心地，其實係佢一早部署緊，想搬間公司去泰國。今次樟記香港結束，咁我就明白點解佢之前問我好多關於項目開發嘅報價啦！我估：佢搬咗去泰國後，會專心搵我地做開發，然後自己在當地生產……至於SP方面就……」