樓價爆升後，政府橫空出招提高印花稅，打窒炒家度氣，有人見樓價咁貴，炒賣成本咁高，於是走去炒車位，搞到呢期車位價勁升，隨手屋邨車位要百幾兩百萬，個別地方仲炒到幾百萬，貴過新界住宅單位。
好多懶醒嘅人話，車位投資好過住宅，事關車位唔使裝修，管理又容易，更加唔使擔心有租霸。冇錯，全中，不過你要問吓自己，買車位投資係為乜，所謂投資，梗係想有個理想嘅租金收入，然後揸得三幾年，車位升值，咁就財息兼收。
回報得兩厘
事實係咪？你要睇睇車位租金現時收幾多回報，除咗個別屋苑外，可以話俾大家知，一般都係得兩厘多啲啲；唔好忘記，車位一樣要俾管理費、差餉同地租，扣減埋呢筆開支，息率隨時只係得兩厘，甚至更低。
你要諗，特朗普上場後，美元強勢到爆，息口預期不斷升溫，十年期長債由1.8厘急升到現時2.35厘，你就知美國明年加息步伐有機會快好多，香港可能短期未必跟，但中線嚟講都走唔甩，投資車位只係攞區區兩厘回報，你話吸唔吸引。
炒賣好易中伏
再者，車位價再係咁上，租金回報會進一步下調，到時跌低過兩厘，更加冇肉食。你可能會話，加車位租金咪得攞，但可以話俾大家聽，除非你個屋邨嚴重車位不足，加上周邊冇任何供應，否則唔係你話加租就加；特別車位唔係好似樓咁係必需品，車主可以將架車擺喺不同地點；又或經濟唔好或負擔重咗，隨時唔要部車，所以租金升幅唔係好似住宅或舖位咁話上就上。
當然，你話買嚟炒嘅，咁又另當別論，喺現時較熾熱氣氛，你博短期有機會再上，但亦好大機會接火捧。若然話買嚟投資收租，可以話俾你聽，過兩年銀行利率回升，你會發覺車位利息回報簡直係可耻，若然你係做按揭，到時扣埋供款，所剩無幾，喺息口趨升時，無謂貪兩厘回報而縛住兩三百萬現金。