未傷好嘅艾朗藍斯，今夏以史上最高英國球員人工(據報40萬英鎊周薪)，南下意大利加盟班霸祖雲達斯，同球王C朗並肩作戰。藍斯嘅威爾斯國家隊師兄、同C朗喺皇馬做過5季隊友嘅加里夫巴利，漸成「銀河垃圾」；原本準備收100萬英鎊周薪，轉會中超江蘇蘇寧，但最終皇馬轉軚，交易告吹。唔去中超，唔代表巴利喺皇馬仲有前途，但冇前途都注定係「人工勝利者」。
阿仙奴拒用15萬鎊周薪同藍斯續約，反而引到祖記爭贏呢位唔傷就會踢出近年英超最佳全能中場風範嘅硬漢。剛踏入30歲嘅巴利，早年入球能力更強，但呢類靠速度揾食嘅英國球員，又係早熟早殘，據講喺皇馬攞緊底薪都有35萬鎊周薪，仲有3年合約。上季季前傳過佢有機會返英超踢曼聯或重回熱刺，依家雪到硬晒，當然唔會再有英超球會肯出貴過「山神」喺曼聯人工嘅傻價。皇馬教頭施丹怕唔夠中場後備兵，暫緩棄巴利，但前途未卜下，唔該佢可唔可以先改下個多年劣評嘅武士髻兼滿臉于思look呢？