周中波多由歐洲賽主打，歐聯分組賽強弱懸殊，雖然8組經過兩輪後得番4支長勝軍，但列強夠分攞首名已達標，不用盡贏。翻查數據，對上一支分組賽6戰全勝球隊，已是2014至15年的「銀河艦隊」皇家馬德里，但當屆最後4強出局；球王C朗離去後，漸變「銀河爛隊」，目前在分組賽包尾，今晚作客土耳其加拉塔沙雷「地獄球場」，冇得hea踢。
美職都有隊洛杉磯「銀河」，享負盛名因碧咸，去年初有「戰神」伊巴謙莫域加盟，打法更加有前無後；加上同市FC洛杉磯一出即大搞，表現愈踢愈好，洛市打吡成美職名牌，令只有英冠中下游水準嘅比賽，照樣受到高度注目。兩軍名牌箭頭伊巴同FC洛杉磯嘅卡路士韋拿，今季聯賽合共瘋入64球；更難得嘅係銀河喺季後賽淘汰圈，成為唯一作客贏波球隊，得以喺香港時間本周五早上，西岸4強戰硬撼西岸一哥FC洛杉磯。「兩洛」對戰常開入球騷，今場可能係「戰神」喺美職最終回，受注視程度點都勁過周四深夜嘅爛鬼歐霸盃啩。