今屆歐國盃冇主辦國下大旺主場一方，4強球隊全部喺分組賽已盡享3場地利；去到淘汰賽只有「三獅兵團」英格蘭有機會多3次主場。英國首相約翰遜先知先覺，喺變種Delta陰霾下，早撐溫布萊球迷入場入數喺最後3場，上限去到今屆最高嘅6萬人，推高三獅主場威力。最重要王牌射手哈利卡尼回勇，暑假投大會靠晒呢鋪，三獅已冇失冠藉口。
修夫基用兵不太重名氣，其中一對防中迪格蘭賴斯同加雲菲臘斯唔係嚟自Big Six，今屆5戰全部正選，係三獅未失過波嘅重要籌碼；另外4位全列正選嘅重心，門將比克福特明顯fit咗瘦咗、中堅史東斯上季喺曼城打返起，前鋒哈利卡尼同史達寧已各入3球。對手丹麥神奇，但始終冇咗基斯甸艾歷臣創造力大減，必用密集防守困主隊。三獅可幸靠英超上季盛產土炮創造性中場，無論出美臣蒙特或基利亞殊，必要時係幫到卡尼喺禁區大爆發嘅變數。卡尼月尾滿28歲，王者級數，估值1億鎊，用一個歐國盃冠軍作為離開熱刺嘅跳板，合情合理。