一周雙賽成例常嘅利物浦，難得可以從英倫寒冬中走轉多哈踢世冠盃，對手又唔強，當豪華集宿讓主將回氣，回來再戰聖誕新年快車檔期，不是壞事。據報中東多哈持續下雨，波士高洛普擔心周二先已連踢兩場嘅卡利法國際球場，到佢哋周三出場鬥墨超蒙特雷時，場地更爛，恐令紅軍再添傷兵。睇番世冠盃數據，歐洲隊近12屆贏咗11次，而且嗰11支冠軍，有近半喺當季聯賽亦封王；紅軍世冠盃同英超都未攞過，今場鬥完蒙特雷，決賽多數鬥巴甲法林明高，牌面同踢爛地都會秤先。就算再添傷兵都好，只要出勤率極高嘅中路守將華基爾雲迪積克繼續健康，強勢中嘅紅軍罩門唔多。
反而留意紅軍最後20人征卡塔爾大軍，只帶走一位威爾斯小將後衛尼高威廉斯，其餘全部留低，今晚喺阿士東維拉主場，要硬食寒風博英聯盃爭入4強。這班未來紅軍之星，難得做主角，今場必一顯實力，未來嘅阿歷山大阿諾特及安德魯羅拔臣，或在此中尋，未必輸俾維拉主力陣容。