最不應離開的「海鮮」
貴為「海鮮波」之首，利物浦如今想連續7季入前四踢歐聯嘅希望，九死一生；嚟緊鬥3支護級隊，尤其作客列斯聯同韋斯咸，恐怕又會扮返羅賓漢「劫富濟貧」。只係睇到紅軍鬥阿仙奴落後兩球下嘅戰意，仍然澎湃；又睇到今屆大跌watt嘅VVD、阿諾同神軒原來打到上身，一啲老退感都冇；其中大把頭髮但經常夢遊球場嘅右閘阿諾，通「坑渠」過辛真高靚交法明奴頂入扳平一球，攞返唔少掌聲。反映喺紅軍統治力仍然高強嘅高普，季尾要睇清楚呢班老臣子，定去留！
最可惜係31歲嘅法明奴上月已自行宣布季後約滿離隊，同之前紅軍中鋒賓迪基、奧歷治之流唔同級數；呢位英超史上入波最多嘅巴西人，一早喺德國打起先投紅軍，身體質素、技術同頭槌早備，把握力強又最好唔貪功，喺英超踢250場入80球50個助攻。呢份CV如果佢要企硬要攞返18萬英鎊周薪人工簽幾季，肯屈就踢英超中下游球隊，可以變救星；如果要個人成就，減人工轉戰意西球壇，分分鐘叻過紅軍，下屆歐聯放光芒。