1998年球季，古烈治統領紐卡素，隊長係英超射球機器舒利亞；當時荷蘭猛人揚言要將「性感足球」帶到東北，可惜未能成事，當屆排13，英足盃決賽輸波，「黑白兵團」之後曾兩度降落英冠。如今擁有沙特大水喉射住，原本萬眾期待，但只見呢兩季入貨循序漸進，話咁快成功突破傳統Big Six壟斷形勢。啱啱狂炒熱刺嘅正選陣容，有8位「黑白兵」喺呢兩季新主簽入，採購部眼光超準。舊人正選得3位，原本後備兵積及梅菲，踢咗8分多鐘入2球；巴西大隻佬祖連頓被調教到勝任中前場任何位置，東北奇景，而青訓兵桑恩朗達夫變真正「長工」，新帥賀維冇用人唯親。下屆大有機會重返闊別近廿年嘅歐聯，但隊波越執越好，高大中鋒、典型射手齊備；只要搵埋攻中般奴古馬雷斯嘅替補，同兩閘簽後生仔加強活力，咁就深不見底。
外界普遍認為阿仙奴明晚爭霸難過曼城，其實兵工廠下月初作客紐卡素更難打；上屆季尾被圍揼吞2蛋，聖占士嗰種壓迫感同新帥主導全場壓迫主攻踢法，小兵最忌，今屆暫時只有海鮮波嘅利物浦，能夠雙殺紐卡素。