歇冬唔係要忙入貨
繼2019/20年球季後，因多種原因到今屆英超先再設歇冬期。但有啲騎呢，因為當中夾雜第3、4圈嘅英足盃，仲要賽和玩重賽；晉級球隊有機會本月要踢3場盃賽，但第3、4圈單計贏波獎金仲奀到只有10萬英鎊多啲啲。再看看英超積分表，曼城都唔敢話有十足信心後上封王，排最尾嗰3隊升班馬都唔好睇死；咁無論係邊10隊，被安排喺下兩個星期嘅英超分頭輪空，都應對英足盃抱隨緣態度。反而用心治好大堆傷兵、讓小部分主力放短假回氣同安排好去中東或歐洲南部較暖地方冬訓當散心，先係準備下半季大搏殺嘅上策。當然喺歐洲賽玩完嘅曼聯同紐卡素，或較重視英足盃，畢竟兩大球會嘅波士上半季交唔到數。
仲有係冬季轉會窗重開，但呢個時期甚少雷霆救兵，3冠王曼城上屆同期買咗嗰阿根廷小兵，今屆借咗去西甲；3大季尾降班隊全部重金入貨冇個得，今屆多數要陪踢英冠，最癲嘅車仔今個冬天應該冇得再亂嚟。
最醍係紐卡素趁愛華頓冇錢，上個冬季4千萬英鎊就撬到英格蘭新星翼鋒安東尼哥頓，但只係鳳毛麟角！