雲爺爺在位太久，排陣固執，球迷心死；但連上屆英超冠軍領隊干地都要排「大巴陣」招呼曼城，非強隊所為，結果全場零中框射門下敗走，可以大膽預測，英超4強已定。兩大昔日倫敦班霸相繼淪陷，一眾舊人鬥志唔強，教練又唔敢喺低潮期多用新人打拼，嚟緊踢歐洲賽唔樂觀，隨時成為兩大名帥嘅催命符。
歐聯今屆戲碼有睇頭，只因英超5隊悉數晉級，本來佢哋嘅最強假想敵，會係愈嚟愈強大嘅巴黎聖日耳門，可惜後者16強要鬥近年冠軍常客皇家馬德里，兼首回合先輸1比3，又有巴西球星尼馬養傷，今晚深夜喺主場踢次回合，唔易翻盤。聖軍教練艾馬利啱啱場聯賽，派咗包括球壇名將韋亞嗰18歲仔添莫菲韋亞、阿根廷嘅盧施素同有波入嘅法國新星尼干古3小將出場，一國班霸，爭標未坐穩船，都肯重用新人為未來發展，今晚必傾力出擊。睇番佢哋對上5屆歐聯行人止步，主場嗰場都係全力開火，每戰總入球咁啱係4球，今晚呢場冠軍前哨戰，精彩可期，值得捧場。