艾迪賀維命中注定
「黑白兵團」紐卡素呢兩年反彈之速，係英超成立逾30年以來罕見；英格蘭少帥艾迪賀維麾下，更無視傷兵成蘿，連勝強敵，佢或者係可見將來，命中注定，史上首位攞英超嘅英格蘭領隊。
英超今屆暫時仲有5位英格蘭領隊，但鶴臣已老、戴治、希堅保咸同加里奧尼爾手下無強兵；最期待，當然係早年已喺般尼茅夫領軍升英超成名、兩年前領軍由沙特大水喉入主紐卡素嘅賀維。黑白兵喺前孤寒肥佬班主艾殊利求賣盤下折騰多年，反而令球隊喺財務公平競爭條例(FFP)下變得更健康。賀維入新兵眼光好外，最厲害係令一眾舊人重生，南美兵祖連頓同阿米朗最出眾，唔少後備兵當打實用，係成功抵禦傷兵潮嘅主因。只見兼顧歐洲賽嘅曼聯、阿仙奴、白禮頓同韋斯咸，暫時聯賽成績都比上屆跌watt；黑白兵越踢越有，呢個半月贏過PSG、曼市雙雄同阿仙奴；近年亦都好少見有一支以英兵為主、配合幾位南美外援嘅英超另類實力分子，加埋無限油元，主場勁爆，睇下呢支東北軍會唔會帶到賀維繼續升呢，向費Sir同雲爺爺之路進發。
