不一樣嘅英超球季，草草收場，但一切好似冇變過。曼城半程放甩，近4季3度捧王；尾三隊一早散晒，埋單計尾四般尼最後贏尾三富咸11分之多。今屆最神奇球隊必推熱刺，擁有全英超最強攻擊孖寶，但季尾踢走主帥摩佬，用唔夠30歲嘅美臣任看守領隊；但煞科日搞局，殺敗「狐狸」幫車仔踢到歐聯，自己就保住第7名獻身來季新產品「歐協聯」，踢歐聯又係嗰4隊。金靴得主又係哈利卡尼，最厲害同好拍檔老孫全季合共攻入40球24次助攻，咁嘅組合仲留低去踢歐協聯，太嘥料啩。排第8嘅阿仙奴，廿幾年第一次冇份踢歐洲賽，都係多得下屆返皇馬嘅加里夫巴利，搞事尾段入2球殺敗狐狸。唔夠料，冇得踢騎呢歐協聯未必壞事，傳統Big Six中，阿仙奴來季變化會最大。英超沒變過，但法甲里爾、意甲國米同西甲馬體會，異軍突起聯賽封王。英超要發圍，計金靴獎往績，起碼要有一位本土頂級射手壓陣才有保證；列斯聯班福特、愛華頓卡維特利雲同阿士東維拉奧尼屈堅斯，等緊上位。
日報