英超膽博膽
原本唔係下位被炒熱門嘅「狐狸」主帥谷巴，國際賽後輸波先落馬，份工相當短癮，唔多似泰國班主維猜家族保守作風；亦顯示呢支2022/23年度降班嗰季，年度輸成9,000萬英鎊嘅中部球會，喺老闆眼中要提早救亡，唔想再落英冠「地獄」，令收入再次大減。谷巴被指踢法唔夠前任馬利斯卡創新，啱啱主場鬥車仔，仲要37歲嘅華dee打正選單箭頭去前場壓迫，真係玩死佢老人家。最弊係比利時中堅菲斯喺降班前都係大炸彈，腳法、身位同頭槌喺英超都唔夠班，下位接手波士係雲佬、樸達或莫耶斯，都要大膽改變踢法。
另外兩支升班馬修咸頓同葉士域治，原本係今季降班雙膽，其實打落踢法同陣容平均過李城；修咸頓以往專出新星，今季又打起18歲嘅迪比寧，要降都有機會幫手賺一大筆。葉士域治用前曼聯青年軍教練麥堅拿，係最大發現，大膽撬一班英冠兵升呢打英超，買人眼光好，愈踢愈好；前線進攻靈活多變有利搶贏波3分，生存機會高過李城，甚至愛華頓同水晶宮。一季功成，他日就有機會重返曼聯啦。