荷蘭教頭威返次
紅軍放甩，史諾治好大機會成為首位捧走英超嘅荷蘭主帥。原來一位只係幫過飛燕諾攞過荷甲同荷盃嘅「光頭」少壯派，嚟到英超冇大鑼大鼓，只用前帥高普留低大量精兵，再令「埃及法老」沙拿戰力再升級；主力又長期健康，部署死球精妙，就可以喺今季超密賽程下，竟然攞住超過10分優勢，爭緊三冠王，替荷蘭教頭喺英超終爭口氣，看似簡單，要複製極難。
強如名帥雲高爾、希汀克以往強勢教曼聯同車仔，都只係攞過英足盃；橙軍一代著名守將法蘭迪保亞，兩季多前接手水晶宮頭4場全敗兼一球不入被炒，成為史上其中一位最短命英超波士。只係荷蘭足球嘅訓練系統同將帥，永遠令人嚮往，英超亦不例外。大花筒嘅曼聯前帥「坦克」Sir，對紅魔嘅影響可能深遠；英超名宿射手雲佬，中途接手教李城近11場聯賽10敗，下季大有機會落返英冠，都睇到唔少失敗例子。新近上位嘅係另一前英超名將雲佩斯，下月將帶領傷兵成籮嘅飛燕諾踢歐聯16強，睇下可唔可以再升呢，將來榮歸英超。