英超管理層百種玩法，唯一類同，係已經幾乎冇長遠發展，每位領隊平均壽命僅一、兩年，球會肯開水喉，做主帥嘅當然唔會同你慳住使；但呢件事發生喺守財如命、吒咤英超廿多年嘅雲爺爺身上，總有點匪夷所思。正當哥迪奧拿一聲令下，眾「藍月亮」球員今周可以放假數天，其他Big Six球員當然冇呢個福份。摩帥1月豪購「山神」，話紅魔今季餘下目標爭第二，熱刺同紅軍就要劍指歐聯；阿仙奴攻擊組合大變，當然要趁周中無戰事，練好新陣迎接歐霸盃、聯賽鬥熱刺同聯賽盃決賽撼曼城嘅「豐富2月」。
5年半前，費爵爺用2千多萬英鎊購入阿仙奴雲佩斯，即奪當屆英超冠軍，成爵爺收山前傑作；依家球壇仲有冇呢類點石成金嘅交易，筆者好懷疑。雲爺用奧巴美揚代基奧特，米希達利恩替山神，被認定果敢；肯用英超次高薪跟年近30、久無佳作嘅奧斯爾續約，廠迷不明白。剛戰米希達利恩交出3助攻，而助攻王「奧燒」食蛋，重押一鋪嘅雲爺可會即時有一點悔意？