「農夫聯賽」等冧檔
法甲享負盛名，三十多年前開創英超盛世嘅先鋒，包括射手簡東拿、亨利，翼鋒真路拿、皮利斯；中場霸者馬基列尼、韋拉及尼高路簡迪，以及守將迪西里，貴為歐洲五大聯賽之一。不過近年被批評者笑係「農夫聯賽」(Farmers League)，一隊PSG玩晒；但最大鑊係PSG冇星冇野心，成個法甲少人睇收入減、出產球星唔對辦，大球會年年虧本，越搞越霉。
歐洲轉會冬窗重開首個大刁，係接近破產嘅里昂，將一年前喺比甲買返嚟嘅尼日利亞新星翼鋒奧班，以接近同價買俾德甲賀芬咸，或步之前逼降法丙嘅波爾多後塵。PSG季前冇埋麥巴比，hea踢夠做山寨王，佢哋喺社交媒體現時最多人關注嘅球星馬高阿辛斯奧，全球排名僅入50位；本身又企喺歐聯分組賽出局邊緣位置，下場鬥曼城係生死戰，法甲係咪冧檔快知，但PSG應該未知死，連隊中法國射手高路梅安尼都想賣去英超，主帥安歷基繼續所謂換血。數史上最貴5大法甲兵投英超，依次係比比、約路、尼當比利、杜古同安東尼馬迪爾，邊支英超強隊今次想做水魚？