學友、Eason開show，應該可以坐滿啟德5萬座位。
學友、Eason開show，應該可以坐滿啟德5萬座位。
明年開幕嘅啟德體育園，係香港演唱會界嘅大事，但目前只有英國天團Coldplay表明會開騷，本地討論只集中喺交通配套。到底有咩歌手有條件喺啟德開騷呢？
所謂有條件，就係叫座力可以達到一晚坐滿5萬人嘅主場館。而家嘅紅館同亞博都係萬幾人，連最大跑馬地嘅大球場都係4萬人。香港好多歌手都喺以上場地分別開過好多場演唱會，咁多場加埋一定唔只5萬人，但要一晚集合5萬人去睇，其實係另一回事。
演唱會界最睇好張學友，歌神近年演唱會都係以場數多見稱，世界巡唱開咗超過200場都仲未完。我絕對唔質疑歌神嘅叫座力可以一晚坐滿5萬人，只係佢會唔會為咗咁，而放棄繼續破場數紀錄呢？
至於另一個搞緊巡唱嘅天王劉德華，世界各地粉絲多當然毋庸置疑，但若要押重注喺一個地方搞大型演唱會，就要放棄喺鄰近城市開騷。例如喺香港啟德開，鄰近澳門、深圳、廣州等其他大灣區城市，甚至東南亞都未必會做，集中叫粉絲來香港睇。須知道好多地方而家都積極發展演唱會經濟，配套齊全，香港係唔係有條件做到獨家呢？
本地歌手，除四大天王以外，係咪真係冇人夠叫座力呢？次次開演唱會都搶唔到飛嘅陳奕迅同容祖兒，又或者再新一代嘅MIRROR又點呢？當中以MIRROR嘅討論較為兩極，有人覺得畢竟成12個人，粉絲總數有一定優勢；但都有人覺得新一代偶像嘅粉絲比較注重要近距離嘅感覺，表演場地太大未必吸引到佢哋。同時亦有好多行內人質疑，新一代歌手有冇能力壓住一個咁大嘅場。
演唱會場地同成個香港一樣，多年來面對土地問題，但其實本地歌手最缺乏嘅係可以容納3千至8千人嘅中型場地，坐5萬人嘅場館可能真係主要靠外地歌手撐住。仲有一個方法，就係搞啲有話題嘅crossover，配合啟德呢個主題。我建議︰鄭志剛X BLACKPINK。