嘲笑當真

偶像粉絲互相寵愛，但粉絲嘅愛有時又會令偶像好矛盾，呢個現象完全體現於最近Anson Lo 被試當真取笑事件。

話說Anson Lo新歌飛咗去沖繩拍MV，青春活力舞步吸引其他藝人同神徒網上一齊參加dance challenge，而《試當真》就剪咗其中一段來玩忍笑遊戲，令部分神徒不滿話要退會，覺得《試當真》挖苦偶像嘅舞姿。《試當真》後來刪走片段，公開道歉。當事人Anson Lo回應傳媒時話，出道以來面對唔同意見，自己冇咩大感覺。而據我了解，唔只Anson Lo，佢公司亦完全唔介意，因為佢哋都唔係第一日被人惡意攻擊，呢啲可以話係小兒科。

粉絲始終唔係呢行嘅人，不滿偶像被人笑而反擊，其實好正常。不過《試當真》落架兼道歉，就引來另一班人攻擊，覺得嘩咁惡呀？講下都唔得之類 。粉絲行為，入晒偶像數。Anson Lo似乎幾無辜，已經被人笑，仲要被人話小器，即使覺得fans唔使咁大反應，又唔忍心指責愛你嘅人。偶像嘅矛盾由此而生。

至於《試當真》，極速落架同道歉令網上批評立即轉向Anson Lo同神徒，有陰謀論覺得係聰明仔計算，但講到底，究竟佢哋嘲笑人唔啱，定係有人講下笑都唔得？

關於「笑話」，維基百科有以下解釋：「『幽默的優越性理論』……一個人嘲笑他人的不幸，因為這些不幸在他人缺點下證實了他的優越性。柏拉圖引述蘇格拉底說，這些特徵表現出了自我愚昧。根據亞里士多德，我們嘲笑劣等或醜陋的人，是因為我們對自己的優越感感到高興。」若果係善意地指出有咩做得唔好，係一個意見(comment)係學術討論、言論自由，完全冇問題。但如果針對嘅係其他人地嘅膚色、身形、性取向、出身等，呢類人類普世共識係需要一視同仁嘅嘢呢，就會由意見變成欺凌。

香港唔應該係一個講下笑就次次要道歉嘅地方，但係亦唔應該係一個欺凌人，無晒理性意見討論嘅地方 。

講到咁遠？唔係扮高深，只係好擔心。