限定聯乘演唱會
MIRROR嘅Jeremy、Stanley、同Jer，以及COLLAR嘅Marf、Winka同芯駖下個月將會有跨團演唱會，係Makerville新項目《MATCHICAL LIVE》演唱會系列嘅第一炮，顧名思義，公司想以不同嘅組合，產生唔同嘅神奇火花。口號仲講埋「限定聯乘，this is Matchical ，更多可能，一一發生」。雖然公司冇透露來緊仲會有咩其他聯乘組合，不過第一炮由呢六位歌手擔當，我睇到三件事︰
一﹑進步。聯乘演唱會唔係咩新鮮事，《拉闊》一直都做緊。不過作為《全民造星》孕育嘅男女團，MIRROR同COLLAR其實係第一次有跨團演出。當初揭曉名單時，仲係喺公司逐個人揭曉，等粉絲估估下，又似乎幾受落，我仲見到有人讚「MKV好似終於識玩了」。
二﹑大膽。作為新項目嘅第一炮，最正常係搵晒兩隊最多粉絲嘅成員參演，但公司明顯冇咁做。而公司願意俾呢六位歌手作為頭炮，將焦點放喺佢哋度，我覺得都係一種尊重，亦代表一種信任。講真芯齡同Winka fans base一定唔係最多，不過總有人欣賞芯齡作為「中女天花板」或Winka嘅唱功，即使今次都唔係個人騷，相信各人都可以吸引到一班知音，粉絲亦會欣賞到偶像相對多時間嘅表演。
三﹑火花。聯乘表演同個唱甚至係本身個團嘅演唱會唔同，就係合作之間擦出嘅火花。好似之前MIRROR演唱會Jeremy同Stanley嗰場辣身舞，或者早排Jer同MC嘅Crossover演唱會，都爆發到佢哋另一面。今次除咗係MIRROR同COLLAR首次跨團演出，Jeremy、Stanley、同Jer，以及Marf、Winka同芯駖都係喺自已團中少見嘅小組，而6人組合中各特色，有團隊中嘅跳舞擔當，亦有歌唱擔當，大家都會期待呢個組合會有咩火花。而火花可貴，唔只在於嗰個畫面，仲可能係短暫，可一不可再，相當難得 。
任何組合都會有人覺得點解冇阿邊個同阿邊個，又或者唔鍾意邊個同邊個一齊。但係演唱會得兩場，又唔使全世界鍾意嘅。演唱會最特別嘅就係現場感，同時多元，仲可能可一未必可再，多啲咁嘅騷，對行業都係一件好事。