橙軍旺人不旺隊

荷蘭國家隊波衫搶眼，由七十年代起，大賽常客，戰術先進，球星輩出，擁躉唔少；可惜自2014年世盃奪季軍後，之前4個足球大賽有兩次缺席決賽周。荷甲傳統三強嘅土炮，依家喺國家隊淪為配角，暫時只有上屆盟主燕豪芬的防中謝迪舒賀順，受主帥朗奴高文重用；其餘位置幾近由外流兵壟斷，可幸歐國盃擴大賽制下，分組賽水準低，橙軍尾輪鬥奧地利難踢，都穩得16強一席，爭霸則難。唯一欣賞中前場星味盡退，反而肯拚肯纏，旺人不旺隊下，荷蘭人要靠歐國盃呢個揀蟀大舞台，老中青三代要搵份好工唔難。

橙軍後生仔好似上屆俾PSG借去RB萊比錫嘅翼鋒沙維森蒙斯、利華古遜嘅謝林美費林邦，最有前途；雙防中舒賀順同祖爾華亞文，正當打要出國趁早。兩大國家隊箭頭、喺馬體會完約嘅迪比，同來屆要返英冠般尼嘅韋格賀斯皆年過三十，更要為新出路爭氣；以荷蘭如今前線手執呢兩張「王牌」，好難怪大家仍沉醉98年喺慕尼黑，橙軍由雲巴士頓入金球破蘇聯門將戴沙夫，封王歐國盃嘅美好時光。