麥巴比要強勢過皇馬

英超歐戰輸overworked，咁5大聯賽最overrated應該係法甲，近十多年該國領頭羊、卡塔爾油元控制嘅PSG從未攞過歐聯；最接近係19/20年喺Covid下嘅濃縮版，8強、4強一場過踢走阿特蘭大同RB萊比錫，最後輸俾拜仁攞亞軍。估唔到法國天王麥巴比來屆離隊投皇馬前，PSG今屆由佢一人之力，再得好籤之助，殺到入4強，距歷史奪冠只差兩步，今晚呢關機會難逢。

PSG球星多，但唔夠團結，而且法甲水平唔高，單係近屆曾挑戰PSG嘅里爾、馬賽同上屆亞軍朗斯，都係一屆貨仔，翌屆例跌watt，令PSG無敵變井底蛙，出到歐聯遇強隊往往臨尾香。麥巴比季後離隊成定局，今屆法甲出場時間係近年低位，反而佢入球數字勢破個人喺PSG嘅新高，即係落到場就搏老命；希望今屆幫球隊攞晒4冠王，掘埋最後一桶金，大鑼大鼓過皇馬。下屆冇咗佢，PSG喺歐洲賽場再低一個檔次，唔易再吸引到一個天才球星加盟；今晚主場對級數唔高嘅蜜蜂仔，全隊戰意應該係近年最強，若果入到決賽鬥到皇馬，呢個歐聯戲碼先拍得住英超「曼阿」鬥到煞科戰爭霸咁激。