歐聯新制仲有蠱惑

兩年多前，12強以西甲雙雄為首密謀叛變，想搞歐洲超級聯賽，結果英超六強率先縮沙，革命極速流產；如今歐洲足協推出歐聯新玩法終於面世，32隊踢一個大聯賽打8場，只要排到喺最終24名或之內，都有機會再踢多2場，大牌球員叫苦。但其實受惠嘅人同球隊多，新人上流機會大。

舊制運作咗超過30年先肯改革，好似英超班霸曼城咁，對上7屆分組賽全部首名出線，好多時去到第4或5輪前已肯定出線首名，hea踢例行公事；再留力年底發力喺英超追分，哥迪奧拿玩到熟晒。究意新制係咪更激，冇人預計到；但任何一隊要鬥4個級別共8支球隊，除咗大戰增多外，以往踢6場攞住8、9分都分分鐘排小組第3落歐霸，好似上屆A米跌落歐霸戰至8強出局。今屆A米嘅8支對手最強係今晚主場鬥紅軍、之後作客皇馬；其餘6隊都係佢哋搶3分嘅獵物，新制會造就更多黑馬分子突圍。唯一疑點係每輪賽事分周中3天進行，鬥到尾一、兩輪要計得失球爭出線，會唔會又有好多蠱惑的波？