歐聯不用急先鋒
歐聯新制表面三贏，球迷多了新鮮感，歐洲足協多增比賽場次，同球會搵多啲，計球會喺分組賽多分逾2千萬港元。不過冠、亞軍一屆最多要踢17場波，所以列強唔想跌入分組賽第9名或以外，要多踢2場附加賽先入到16強，大於財政考慮，但實情係歐聯是否要場場去盡？
分組賽暫時榜首係多蒙特、最驚喜係比斯特同維拉，爭霸4大熱門依次曼城、阿仙奴、拜仁同皇馬已相繼失分。始終聯賽重要性大過歐聯(PSG除外)，而Opta嘅超級電腦統計過，攞到5勝1和16分，夠分直入8強。以皇馬為例，雖然上輪敗走里爾，但今晚同下輪主場雙殺多蒙特同A米，便會重奪出線控制權，可以谷埋呢兩場，然後多用二線兵同新人，老謀深算嘅安帥唔會唔識玩輪換。反而一啲二線隊，心雄又怕唔夠分，必然場場去盡，上屆「兩頭唔到岸」嘅英超紐卡素同白禮頓就係最佳例子。今屆季初醒神嘅維拉，大賽經驗少、精兵又不足以應付兩線硬仗，嚟緊唔夠20日踢6場，睇下阿根廷「神龍」馬天尼斯救得隊波幾多次。