職場攻心秘笈—想過肥年：7招討好上司(下)
【前言】
從今開始，專題式的文章：每月兩期(當然歡迎讀者出題目比我)；小說式的《EC職場周記》：從今期開始，逢三、五早上刊登。多謝大家繼續支持！
上回講到：
畢哥從客戶中學會了《埋年攻心秘笈》。他開心分享比楚丁，講到一半，比碧姐迫他們要先專心工作，故此，他們相約午飯繼續分享……
【白紙黑字】
楚丁：「『畢哥』！呢到呀！」
畢哥：「唔好意思！要妳搵位、叫埋、仲要搞到碟飯上埋枱……我都仲要遲到！」
楚丁：「你忙吖嘛！崔經理！」
畢哥：「唔好咁啦！我特登搵返段訊息，抄落個檔案到，仲打印埋出來方便妳……先搞咗咁耐啫！妳睇下：」
楚丁：「《埋年攻心秘笈》，好認真喎崔經理！呢次唔係『吹』，係『堅』喎！」
【果然厲害秘笈】
畢哥：「嗱！妳睇住份嘢！我邊食邊講……若果唔係，陣間又要等𨋢，遲到又要俾碧姐話㗎啦！」
楚丁：「你都唔怕碧姐嘅！」
畢哥：「妳今朝無聽書咩！今早講果兩招：《有假唔放攻心術》同埋《有借有還上等人》，大概都係關於挨年近晚，儘量唔好俾人捉到咁多『痛腳』……！」
楚丁：「咁又係喎！」
畢哥：「嗱！第三招叫做《清倉行動斷捨離》，意思即係：公司有好多物品，若果是貨，儘快出售，要錢唔要貨是金句！若果是雜物，就用妳最叻嘅『斷捨離』信念，減少『宅過年』的物品……記住：唔清楚係貨？還是廢品？要開聲問；不然，把有價值的貨扔掉，妳就一身蟻！」
楚丁：「咁你放心！碧姐睇得好緊，有邊個可以扔掉碧姐啲錢吖？」
畢哥：「第四招叫做《細水長流客似雲》，意思即係：客唔怕多，最怕係疏！大客細客都係客，哪怕一年幫襯一次！係公司手上就係自己客，總好過游咗去人地公司！」
楚丁：「呢招好似你應該同自己講？我又唔係做銷售？」
畢哥：「我講出嚟，除咗教識妳，我都想妳整理單據時，見到啲『鎖碎』單時，順帶都可以提提我嘛！」
楚丁：「無問題！收到！」
畢哥：「第五招叫做《知己知彼福自求》，意思即係：現在疫後新常態，有好多人材湧出市場，妳要定期留意下招聘廣告，睇下啲市價，同埋涉及嘅職場技能……要做到知己知彼！如果唔係，俾碧姐知道原來炒咗妳，出邊可以請返兩個相似職位，咁就太遲了！」
楚丁：「……好驚、驚……」
畢哥：「第六招叫做《毛遂自薦損益表》，意思即係：自己把自己一年的功、過，好似會計既《損益表》咁，左右列舉出嚟……」
楚丁：「邊有人咁蠢？把自己的錯列晒出嚟㗎？」
畢哥：「叫妳準備定啫！唔等於叫妳交出嚟！咁樣叫做以防不時之『衰』！萬一老闆數妳的罪，妳隨手都可以攞份表出嚟，起碼對應嘅功勞，即時可以分享，提醒一下老闆：『我唔係混飯吃嘅』！可以保得住條命仔，過埋個年先！」
楚丁：「緊急求生掣喎！」
畢哥：「梗係啦，最後關頭，仲唔發揮小宇宙咩！第七招叫做《絞盡腦汁自由行》，意思即是：係妳既範疇，儘量絞盡腦汁，有創意地，幫公司下年諗定一啲『開源』或者『節流』嘅方案……有無人聽？有無可為？都唔係最重要；最重要係：關鍵時刻，老闆一問，妳即刻有計……咁就不得鳥啦呢次！」
楚丁：「不得鳥？」
畢哥：「呢次妳仲唔係老闆『求之不得既籠中鳥』！我地都是想穩定自己崗位，唔好影響公司，係咪『籠中鳥』唔係問題！有料既話，對每個老闆嚟講，好嘅夥記都是『求之不得鳥』！」
楚丁：「弊！不得了！掛住講，就嚟遲到添……」
《EC職場周記》角色介紹
本劇主要圍繞4位主角，分別是兩男兩女。
趙達標：總經理。任務導向，人緣方面就……
崔畢源：銷售經理。開朗樂天，講就天下無敵……
歸楚丁：初級文員。任勞任怨，平易近人……
沈碧堅：行政主管。有原則，要求甚高……