EC職場周記—搵工跳槽過聖誕？(上)
【前言】
公司上下，一向楚丁都是最乖，最順服……當大家都準備在年終前，把手上的工作處理好，等公司派份大花紅，過肥年之際……竟然傳出：楚丁有異心，正在搵工跳槽，「雙糧」一到手後，就無得「商量」……
【心神恍惚】
碧姐：「喂楚丁……！俾牛頭角嗰客份報價，妳出咗未㗎？」
畢哥：「楚丁！楚丁！妳到邊呀？我喺茶餐廳霸住兩個位，雖然落咗單……但係午市客人多，唔撐得好耐啦！妳仲有幾耐到？……咩話？妳叫咗外買！仲食緊添！咁妳今朝就唔好約我啦！咁依家叫咗嗰兩份午餐咁點算？」
趙總：「楚丁，我噚日叫妳把說明書單頁影印，預備3套副本，放咗喺邊？……吓呢堆30套雙面影印就喺？又唔啱我嘅單面要求！仲要印錯數！妳快快脆幫我準備過！我趕住帶出去開會……」
眾人心想：「楚丁搞咩？呢個唔喺我哋識嗰個楚丁嚟嘅！佢究竟發生咗咩事？」
【機構留言】
趙總：「阿碧，妳入一入嚟我房！」
碧姐：「趙總，搵我咩事？你唔喺趕住出去見客咩？」
趙總：「係！不過臨出發就發現楚丁搞錯晒我噚日吩咐佢嘅事，佢現在幫我重新印過晒！所以咪諗住返房做多一陣嘢先，點知聽到呢段留言……」
趙總電話中的錄音：「……X#@*我姓張，我哋剛剛收到歸楚丁小姐嘅申請，由於她填寫趙達標先生你做推薦人，所以手續上我哋會致電趙生你本人，親自確認一下……請你聽到呢個留言後，打返呢嗰電話：2XXX 5656搵我，張生。再見！」
趙總：「嗰衰妹唔通搵工跳槽？」
碧姐：「唔會掛趙總！呢個妹為人好率直！有講多無講少！我從來都未聽過任何做得唔開心、想搵工、轉工……之類嘅消息！」
趙總：「若果係咁！嗰留言又喺咩來頭呢？」
碧姐：「我都奇怪！最衰嗰留言第一句：『X#@*我姓張』，都聽唔清楚張生係咩公司！」
趙總：「咁我依家覆過去，睇下張生喺邊路人馬？咁咪得囉！」
碧姐：「唔好咁心急啦！趙總，你專心出去見客先！呢啲行政嘅事，等阿碧我幫你分擔一下……我打算搵阿畢收下風先！啱啱楚丁先至約阿畢食午飯，好似有啲嘢要商量咁！」
趙總：「就咁話啦！阿碧，妳每次都係幫我分憂！從來都唔會俾麻煩我……」
碧姐：「趙總，我份內事嚟啫！」
【嚇親畢哥】
碧姐：「阿畢，你有無聽到楚丁想轉工？」
畢哥：「點會呀！呢個年尾季節，嗰嗰都掛住份花紅，點捨得走？就算要轉工，都喺我阿畢先啦，幾時排到楚丁吖？」
碧姐：「只不過，趙總收到疑似新公司打電話嚟核查楚丁啲資料喎！」
「砰！砰！」碧姐話未說完，畢哥手上的玻璃杯掉在地上，應聲爆碎了！水和玻璃碎片遍落一地，畢哥的褲管也弄濕了！
畢哥目瞪口呆：「唔怪得之啦……！」
【下期待續—本週五】
《EC職場周記》角色介紹
本劇主要圍繞4位主角，分別是兩男兩女。
趙達標：總經理。任務導向，人緣方面就……
崔畢源：銷售經理。開朗樂天，講就天下無敵……
歸楚丁：初級文員。任勞任怨，平易近人……
沈碧堅：行政主管。有原則，要求甚高……