孩子做事衝動心急、唔識分緩急輕重，好可能需要練習分辨事情的優先次序。去玩夾公仔機，本來是娛樂遊戲，但由於好勝心「想贏」的感覺，最後夾不到就原地大哭或發脾氣收場。有時家長真係「貼錢買難受」，原本想一家人開開心心放假去玩，最後仍是出現「不和諧」的情況。對於孩子急於一時的「衝動消費」，未能遵守自己的承諾「止蝕離場」，其實大人也豈嘗沒有這樣的行為呢？今日筆者想與大家分享和孩子討論重要和次要的例子，藉此說明教導事件優次排序的重要性。
益仔(化名)是初小學生，經常在學校被投訴行為衝動，有時會語言衝撞、亦有試過被投訴有撞人的行為。當然每一次他也有自己認為的「原因」(例如：他想要走過去優先取得書簿)，但這些都不能成為他所做行為的合理「理由」。
以下是筆者(A)與益仔(C)的討論內容：
A：今日我哋會學分辨重要同埋次要。你知唔知道重要同埋次要係啲乜嘢呀？
C：知呀，重要就係一定要做嘅嘢囉。
A：咁你有冇例子乜嘢係重要嘅事呀？
C：嗯嗯，飲水吖，飲水係重要。
A：咁你點解覺得飲水係重要啊？
C：因為唔飲會死囉！
A：即係話你覺得唔做會死嘅，就係重要嘅嘢？
C：係呀。
A：咁仲有冇其他例子？關於重要嘅嘢......
C：睇YouTube啊。好重要㗎。
A：喔？係點㗎？
C：我每日一定要睇兩個鐘YouTube㗎。
A：嘩，兩個鐘頭好似都好多喎。咁你乜嘢時候會睇㗎？
C：咁我會喺做完功課之後先睇嘅。
A：咁都幾好喎，即係話做功課係重要過睇YouTube啊？
C：唉，都係嘅，因為唔做唔得㗎嘛！
A：即係話呢，睇YouTube同埋做功課同時間出現嘅時候，邊一樣係「重要」邊一樣係「次要」呀？如果兩樣一齊出現嘅時候，咁你做邊一樣先呀？
C：咁啊，做功課先啦，跟住先睇YouTube嘅。
A：咁樣你做得好好喎！當兩樣嘢同時出現嗰陣，可能我哋會將「重要」同埋「次要」嘅位置改變㗎。咁係屬於正常嘅！
從這一個討論裏，我想帶出工作排序的基本概念，就是重要的事要先做，次要的事情可以等待一下才做。討論時也可以引導孩子說出該件事情重要的原因，可以多了解小朋友對於事件的主觀想法，這樣就可以協助他釐清事情的本質是否與他主觀認為的同等重要。
緊記我們要保持開放的態度，切勿急於評價孩子的想法(e.g.睇片有乜嘢咁急呀？！即係你覺得唔睇片都會死？)，應該更多接納和探索思考的過程(e.g.喔？我第一次聽你呢個講法，可唔可以講多啲畀我知？)。這絕對是你送給孩子最好的禮物，畢生受用。
其實人人都可以訓練「執行功能」，令自己更清楚工作流程、做事的緩急輕重，相信不論在哪一個情景也有助益！