「醫生，我腰骨痛咗好多年，今次嚟睇你之前，去咗一間痛症中心接受治療，但做咗二十幾次都無改善，俾哂錢嘅預繳式療程又無得退款。」
「咦？我幫你Google一下先⋯⋯原來幫你做治療嘅，唔係受監管嘅註冊專業人士喎！點解你會走去睇佢哋嘅？」
「我怕睇西醫要食藥，或者叫我做手術，佢哋又標榜唔使食藥、無介入性治療，都可以好快好返。佢哋又有明星做代言人，仲有好多真實顧客推介。加上佢俾我限時優惠，買十次療程送多十次，又可以用信用卡分期付款，每個月交千幾蚊。講多兩講，我耳仔軟就簽咗約啦！因為我痛咗咁耐，好想買個希望可以好返哂！」
「唉⋯⋯喺香港只有西醫先可以開西藥同做手術，但有啲病人總係諱疾忌醫，反而相信一啲由電視劇入面，飾演大醫生嘅大明星，做代言人嘅痛症療程。其實痛症患者，並唔需要長期食止痛藥；而真係嚴重到需要做手術嘅病人，通常都係佔好少數。如果將『唔想食藥、唔想做手術』同『咁就要幫襯痛症療程』劃上等號，就好明顯係一種混淆視聽嘅銷售手法喇！」醫生一邊為病人檢查，一邊問：「話時話個療程貴唔貴㗎？」
「折咗40次合共4 萬蚊有找！佢話如果用唔晒，預繳係無得退款，仲要喺12個月內完成治療。佢仲話如果唔做足40次，同埋密啲做，治療效果就會無咁理想。」
「哦⋯⋯我幫你檢查完，又睇埋你啲X光片，發覺你嘅腰背痛，主要同你平日缺乏運動，令到腰肌無力，加重腰椎間盤同小面關節受壓有關，暫時未嚴重到要做手術。我建議你食少少消炎藥，做物理治療，加埋Keep住做運動強化腰肌，通常痛楚都會慢慢改善㗎啦。」
「吓！治療痛症真係咁簡單？A餐食藥，B餐做物理治療，加埋C餐做運動，咁坊間就唔使有咁多D、E、F、G痛症套餐啦！講返我買依個套餐，好似叫做⋯⋯『KK完美消痛療程』。」
「哈哈！改個名起頭叫做『KK完』，唔通真係同緬甸KK園有關？你講起英文字母，我諗起呢幾年都遇到唔少病人，FF(幻想)俾咗5至6位數落痛症療程，痛症就KO完。先此聲明！我唔係話由非專業人士提供嘅治療就一定無效，但新聞都成日報道，唔係個個做完療程都OK，痛症持續之餘，預繳嘅費用亦通常GG(完蛋)攞唔返！」
「醫生，你都知我使咗唔少錢落『KK完』療程⋯⋯今次診金，可唔可以計我平啲呀？」
「原來你數口咁精！唔怪得當初咁識得『精打細算』，成為佢哋嘅『特選客戶』，去買呢啲多買多『送』嘅痛症療程啦！」
註：
- 本故事改編自病人的親身經歷。
- 消委會於562期《選擇月刊》，以「痛症療程須三思 慎防無效又破財」為題，報道消費者就坊間痛症療程所作出的投訴，主要涉及「療程沒有效果」和「不良銷售手法」。當中有個案被成功遊說，購買合共30萬的療程套票。
- 痛症有不同成因，更有可能是嚴重疾病的病徵，故此患者在接受坊間痛症療程前，應先向註冊醫護專業人員徵詢意見，以免延誤診斷及治療。