《三命》劇照。
ViuTV新劇《三命》開播，係銀河影像同Makerville首套合作電視劇，網民普遍覺得故事好緊張、有穿崩位但可體諒、好有銀河風格之類。劇情以外，我想講下三個重要觀察：
首先係耐性。由製作到播出歷時四年，除咗因為用心製作，嚴謹嘅劇本，認真嘅拍攝同後期，我睇到嘅係耐性。唔只係創作人，製作方出咗錢又係要等幾年，連演員都係極有耐性。劇中大量角色係新人，你諗下明明拍咗套劇期待被人看見，但要等四年先出街，主角蘇家樂就係咁做咗幾年素人。呢種耐性係香港少見嘅，換來嘅就係香港少有高質嘅作品。
第二係勇氣。平行時空嘅劇情唔係第一次見，但主要喺電影度出現，好似《樹大招風》咁，三條線只要剪接得好就會清楚。《三命》嘅難度在於一套12集嘅電視劇， 仲要三條線幾乎係同一班演員，新演員觀眾又唔熟悉，編劇同導演要花好多心思令觀眾清晰幾條線嘅劇情。難怪監製都話幾乎日日睇剪片，聽講佢哋淨係拗點剪，同用邊個版本都搞咗年半，可惜電視劇冇資格角逐《金像獎》。
第三係方向。由《三命》睇到Makerville除咗係一間經理人公司，更加係創作人/內容公司，正如上述佢哋喺創作上嘅耐性同勇氣，反映佢哋專注嘅範疇同埋長遠想走嘅方向。其實由ViuTV開台嘅實況娛樂，去到之後Makerville內容方向嘅項目，包括獲台灣金鐘獎嘅《八尺門的辯護人》、文藝電影《少男少女》(呢套少人知但都入圍金馬獎)、以及將會拍攝嘅荷李活級製作《The Season》，連同《三命》呢種破格嘅港產電視劇，都係反映大家平時最關注嘅，都未必係Makerville真正重要嘅方向。
香港業界要長遠發展，產品內容先係最核心嘅，我覺得Makerville都睇到呢個重點，不斷嘗試跳出香港娛樂圈嘅困局，用作品做主幹嘅模式，如果大家一齊咁做，相信香港創作就有機會提升到同世界接軌。就好似《三命》嘅主角，揀邊條命會有咩結果係唔知嘅，但公司或業界嘅方向就好似一個人嘅性格咁，會影響之後劇情嘅發展。