Lolly Talk今年成績有目共睹，年底樂壇頒獎禮組合金獎，可說是囊中之物。
開個盤︰Lolly Talk 99%機會打贏COLLAR，一半機會贏埋MIRROR，喺年底樂壇頒獎禮組合獎中奪金。我冇內部消息，純粹分析走勢歸納咗三點。
第一 利益平衡：
MIRROR、COLLAR、ERROR呢幾年成為娛樂圈熱話，唔開心嘅點止大台？有大量人不知幾咬牙切齒，而最有效嘅應對，就係全城一齊力棒另一班人，就算紅唔過都要分薄下。以前四大天王屬於唔同唱片公司，你叫天王一號做嘢時可以話：你唔幫手我就搵天王二號㗎啦！而家MIRROR、COLLAR、ERROR係同一間公司，大台又只得一兩個歌手做得好少少，俾著我都會開大turbo幫其他藝人啦，平衡下有著數。娛樂公司、部分媒體。甚至電台，都有呢種計算。唔止Lolly Talk，仲有幾個藝人單位，都得到成個娛樂圈嘅特別寵幸，其實背後都係呢個計算。
第二 背後公司高超市場策略：
吓？咩背後公司？Lolly Talk唔係自資咩？以我理解，Lolly Talk係一班好有熱誠好努力嘅女仔，但圈內公開嘅秘密係，背後有啲好叻嘅人/公司，好大力支持佢哋。佢哋亦好明白香港人鋤強扶弱嘅心態，「姊妹班」、「自資」就梗係入屋過「大公司旗下藝人」，所以收埋「老闆」或「公司」呢個身份，但又提供各方面嘅資源同人脈，聽講尤其喺演唱會演出呢個範疇背後大力發功。令女團有強大嘅支持，但又冇負面元素，計算精準。
第三 ViuTV嘅open(其實係低能)：
ViuTV開台一早講明開放平台，俾所有藝人上佢哋個台，早排Chill Club請Lolly Talk上去，仲要喺社交平台谷佢哋個表演片段，連Lolly Talk個《四方帽之約》MV，都竟然俾193去做男主角，盡收話題流量。個平台有冇開放到咁呀？我開始懷疑係低能多過open。唔係話要你封殺，但依家唔止係俾機會，直情力推咁款。
綜合以上三點，作為抗衡MIRROR等組合嘅籌碼；背後推手製造最佳定位；仲要連ViuTV都慈善團體上身咁款推佢哋，全個娛樂圈大合奏咁，試問Lolly Talk有咩理由唔會上到最最高位？