MIRROR的個人演唱會
隨着AK嘅演唱會落幕，一系列鏡仔個人演唱會亦暫告一段落。Jeremy、姜濤、Anson Lo、Edan、Jer、Ian同AK七個人嘅個唱，如果有睇晒嘅朋友，相信都會認同我個結論，就係每個演唱會風格都好唔同。有啲音樂性強啲，有啲視覺震撼多啲，有啲搞笑，有啲性感火辣，有啲真摯，有啲華麗，有啲主要睇個人，有啲就好多朋友做嘉賓。再一次證明，啲人成日話MIRROR係啟蒙自韓團，我覺得係全宇宙最大嘅誤會。
韓團模式係全組人每一個動作、眼神，甚至乎對腳嘅長度，幾乎一模一樣。無可置疑呢種的確係好睇嘅男/女團模式，但好明顯就唔係MIRROR嘅模式。全宇宙邊個男女團會短期內開咁多solo演唱會，每場過萬人，仲要「容許」不同風格。我用「容許」呢個字，唔只係講緊主辦單位或者公司俾嘅自由度，更重要嘅係粉絲廣闊嘅接受能力，每種Style都搵到佢嘅知音人。又或者可以話，鏡粉根本就係鍾意佢哋每人有唔同特性，MIRROR從來最可貴就係每個人都可以做自己。
一個男團齊輯輯，粉絲單一偏好，支持力量更集中。而「容許」班仔用真實一面吸引不同性格嘅粉絲，呢個策略好處係好有人性；但唔好處就係，同團粉絲之間互相排斥，唔鍾意甚至討厭同自己本命不同風格嘅隊友，容易出現派別之爭。有人鍾意性感妖艷，就會有人話佢扮嘢；有人鍾意內斂嘅，同時亦有人就會覺得佢冇禮貌，加上誤會同網上haters挑撥離間，就會出現分化。當然亦都有人係鍾意本命之餘，亦都鍾意成個團嘅團結，但往往會被分化嘅「仇恨」掩蓋。
以上講嘅唔係啱晒，鏡粉絲嘅現象當然複雜一百倍，我只係想講，任何一種形式就有佢嘅好同壞，只係睇下我哋想揀啲乜：究竟想揀齊輯輯嘅一體化，定選擇有血有肉但要和而不同嘅多元化？