樂隊ROVER。
ViuTV早幾日搞咗個《CHILL CLUB》記者會，宣布將同泰國音樂圈深入合作。除咗MIRROR、COLLAR外，好驚喜見到咁多泰國歌手在場，聽聞有啲喺泰國真係天王天后級，專登飛來同香港歌手互動。
呢個港泰合作，我覺得有兩點要提：首先係ViuTV主動促進兩地音樂交流，帶到香港藝人去泰國之外，亦都開拓香港觀眾視野，唔單只要有錢，仲要有心。第二要讚嘅係，用咗咁多錢同心機請班泰國歌手來香港演出，ViuTV亦唔只益自己人，我見合作名單中有其他唱片公司嘅藝人，共享交流同宣傳嘅機會，確係大量兼大愛。
當日記者會上，發生咗一件小插曲，《造星》最新樂隊組合ROVER嘅亨仔，上台時唔小心批踭批到Anson Lo，大家都知佢唔係有心，Anson Lo現場亦表現得體，立即話冇事。但亨仔事後立即喺網上道歉講「對唔住師兄」，結果大部分神徒都受落，仲話亨仔好可愛，覺得佢起身上台嗰下，真係成個細路咁，有種「好嘢﹗老師終於叫我啦！」嘅興奮童真。呢個結果我覺得係亨仔儲落返嚟嘅「因」。《造星》時佢成身肌肉，用粗壯嘅雙臂自彈自唱《寂寞先生》，勁感動(極力推介大家重溫，記得睇埋佢之後講嘢)，粗壯同溫柔對比大到十分可愛，亦都種下佢討好嘅形象 。
呢件小事喺網上有唔少討論，ROVER今年出道後好努力出歌同去表演，連busking都唔放過，近排佢哋嗰首《男孩子不要流淚》，旋律其實係大熱嘅作品，但藝人有時真係除咗努力同實力以外，仲要睇命水。亨仔同ROVER又點諗到一個批踭仲多人討論過佢哋首新歌呢。或者ROVER知名度未夠高，但只要唱歌唱得好，等待機會總會被人看見。同時都考驗佢哋嘅修為，唔好被現實打擊，繼續專注做好自己做好作品，繼續保持嗰種赤子同率真，啱啱起步啫，希望更多人會慢慢欣賞佢哋。我都好想睇亨仔有日上台攞獎，不過唔知又會唔會唔小心批到人。