近排離不開拍攝，教校外課程指導學員拍攝體育短片，自己工作亦作為創作人拍攝電視台外判節目。
大學生學員，討論起來大想頭，一時話聘請個KOL做主角時薪多少，一時話book個靚場租金多少，老師我不好意思說：「吾輩職業實戰，嘉賓靠碌人情卡、捱義氣；場地靠贊助、鳴謝而已。新聞採訪，更絕不能付錢。」孩子們太幸福，習慣消費主義。
到開鏡拍攝，學員十分鐘短片搞足兩日full day，外判那邊半日完成一集半小時節目。這當然與budget有關，盛世不再，時間等如金錢，慳得就慳。我不禁擔憂：「學員將來怎對應實際職場？」
行文至此，要感慨一句後生仔唔知米貴、太理想化、手腳慢、無效率……很容易，但我並不如此想。
某同事說得好：「基本功還是要先煉熟，慢工出細貨，知道何謂精緻，盡量達成；日後就業，即使打晒折扣，仲有個底剩。」頗似武俠小說，學齊七十二路擒拿手，臨敵決勝，間不容髮，看準哪招最派用場，揀一招了斷。
「台上一分鐘，台下十年功」，聽得耳朵起繭。時移勢易，何來十年時間給你鍛鍊啊？務實地講，新丁大概一年左右摸索便要擔得起大旗吧(擔不起反正已經一早淘汰)，然後限定在幾小時內趕完一個job。所以，我改成：「台下一年功，台上幾粒鐘。」
夢與真相差很遠，總之莊敬自強。
[email protected] 逢星期五刊登