城城的演繹，一如以往落足力。
譚真一的演繹，近乎匪夷所思。
「佢」，是《殺人犯》的真兇。如果由「佢」玩10 Year Challenge，兩張相中的「佢」應該Exactly一樣。
1.先旨聲明，如果你十年來都冇睇過《殺人犯》而又有諗過在未來睇的話，請不要再讀下去——這是一齣絕對不能被穿橋的電影，你必須完全無知地去睇，去了解成個謎，才會產生城城在戲裡的感受：「冇可能！冇可能！」
2.2009年，你睇過邊齣戲？邊齣戲令你記憶猶新？你未必記到以致未能立即答到，我呢，就肯定記得三個字——「殺！人！犯！」(那三個「！」無非為了加強氣氛，以及嗰份記憶猶新)。
3.如果你有睇過，自然記得(你冇睇過？都叫咗你不要再讀下去)，電影的開始，是一棟住宅大廈，突然一條人體由高空跌落嚟，成身血，呢條人體未死，只係就死；正當呢條仲有一息尚存的人體想企番起身時，Sorry，不能，因為腳骨已斷。
4.而主角城城——他的角色名字是「凌光」，人稱「光Sir」，正伏在大廈某層走廊。
5.光Sir，在警隊擁有大好前途，好快就升警司——升做警司後的他會否經常(帶女伴)自出自入「安全屋」？應該唔會啩，畢竟他擁有一個大好家庭，家庭成員包括一個極度漂亮的台灣老婆，以及一個生得(過分)精靈的養子——光Sir親生兒子，在他一次掛住捉賊的過程裡，意外死了。他一直耿耿於懷，所以同自己講，一定要好愛錫呢個養子。一家三口，住在破邊洲附近一間望海的House。一開始，我以為這間屋只用來凸顯光Sir的優質生活，到後來才明白這間House的位置所在，是為了鋪排之後一場重頭戲……
6.講番那個由高空跌落的人體，真正身份是泰Sir，光Sir同僚，老差骨一名。他身上之所以咁多血，原因是他被冷血兇徒用電鑽鑽了大量的窿——而最近已有兩條屍體，被發現身上布滿大量用電鑽鑽開的窿。
7.故事一開始，光Sir就成為嫌疑犯，而因為是嫌疑犯，升警司一事惟有暫時擱置，Shit……到了連光Sir都開始懷疑自己時，他開始變得失常(影帝城城的演技也由之前的沉鬱逐漸變成癲喪)；到了終於真相大白的Moment，城城/光Sir終於在真兇面前爆了：「冇可能！你係鬼！」
8.真兇竟然是養子！他陰陰咀說：「乜鬼真係會容易接受啲咩？可能係啦，你哋啲人呀，寧願接受鬼，都唔會接受我哋呢啲怪物呀！我由細到大，都唔會大，唔會老，10歲又係咁，20歲又係咁，30歲都係咁，直到我俾人拉咗去醫院，先知道呢個係一個病，叫「不！老！症！」(為營造此病症的震撼，養子專登逐個字「凳」出來)。精靈的養子，竟然是光Sir同父異母的細佬！一個被光Sir個衰老竇遺棄的可憐細路，從此同阿媽過著無依無靠的悲苦生活。搞咁大壇嘢，For What？好彩佢唔使光Sir(和觀眾)估，立即和盤托出：「我係想你感受一下，呢個世界，乜嘢叫做委屈！」
9.真相大白一刻，電影只播到1小時20分，餘下的40分鐘，才是《殺人犯》精粹——憤怒的光Sir決定手刃呢條契弟(嚴格來講真的是他弟弟)，在某個陽光燦爛的日子，帶佢出浮台，再掟佢落海，等佢自行浸Q死！——點知呢條契弟竟然識！背！泳！那一個在綠波中悠然自得地游著背泳的畫面，已成為香港電影史上一個名場面。
10.十年前看《殺人犯》，真的好！震！撼！十年後再看《殺人犯》，更明白了一件事：「人生七十古來稀」原來真的不合時宜。我甚至開始懷疑，羅局長有睇《殺人犯》而且仲好鍾意……
飾演城城老婆的是張鈞甯。
電影最後40分鐘，是城城一連串復仇戲。