西隧加價，連鎖反應其餘兩隧擠塞，想又平又快「開車」過海，難道要學婆婆推手推車入隧道？網上瘋傳，無花無假。你問怎可能做得到？我話，掂行掂過就做得到。
繳費亭忙着，不會出來查看；其他員工各司其職，看着阿婆入去，嗯，一定有人批准的，總之不關我事。正如偷坑渠蓋成風，大街大巷怎偷？就是兩條友光天化日拿鐵筆撬、攞走囉！咁簡單。途人見到，只以為渠務署或其他工程人員在開工大吉，唔信？賊佬戴多個頭盔你就必信，頭盔周街有售。我敢說，連警察巡邏也不會多問。
安全城市，並非見怪不怪，根本存在就等如合理，全城缺乏警覺。多年前，明愛醫院內的文員竟叫十萬火急的求救者自行打九九九（急症室就在隔籬），除了冷血，也是欠應變意識。從幼，港人受的危機訓練限於撥九九九。智能手機流行後，電話最重要功能已非撥號，萬事打咭為先。所以，阿伯電動輪椅闖入高速公路飛車，幾十條片擺上網，偏偏沒即時報警，唯覺過癮。
更不用說，槍戰以為拍戲，安享太平無可救藥。最近還發生另類社會實驗──學生放一百蚊紙在路上，等人執，然後報警(當然全程攝錄啦)。姑勿論其道德問題，單講風險，你在大陸敢嗎？敢擔保公安不扭送你尋釁滋事？拾遺不報者反過來打你一身都仲得呀。港豬。