星爺轉載混血肥仔的節目，算是提攜背輩。
最近「混血肥仔」曾達恩主理的YouTube頻道BBO又有新搞作，拍攝了短劇系列《人生好似好很難》。搵來旗下女主持「丁丁」丁彥均做主角，更請出林雪、陳凱琳、魏浚笙、吳浩康和古天樂客串，最新一集除了有闊太「甘比」陳凱韻出場問人借錢，更有疑似「星爺」周星馳(全程影背脊，未有露出正面)壓軸出場。事後星爺都有轉發短片，不論畫面中人是否星爺本人，都明顯是一次攞正牌的合作，也算是一個創舉。
與星爺合作過的人，好多，與他不再合作的人，都好多。當中更有不少人喜歡事後對他冷嘲熱諷，常常數他的不是，其中一位就是大導演王晶。兩個月前，有「爛片王」之稱的他進軍YouTube，講足三集與周星馳的恩怨情仇打響頭炮。節目入面他直指周星馳是「向來喺我心目中都係一個冇得頂嘅演員、一個非常用功嘅導演，只係唔適合深交嘅一個朋友」。去到最新一集仲請來「叻哥」陳百祥再抽星爺水，陳百祥話初次與星爺合作，諗住傾興趣時投其所好搞好關係，可是對方竟答鍾意睇梵高：「我即刻好似山頂跌落嚟，一盆冷水淋落嚟！」令他自覺難以與對方做到朋友，話自己高攀不起。
如果齋聽他們講，肯定會受影響覺得星爺尖酸刻薄，絕非善男信女，但事實上又是否這樣？月初，「一代大俠」徐少強於北京因食道癌逝世，享壽73歲，不少與他有關的舊聞再被翻炒，例如麗的電視1979年播蕭若元創作的武俠劇《天蠶變》，他演主角「雲飛揚」，收視強勁，逼到對手無綫黃金時段要變陣迎戰；又例如他瞞住第二任老婆何淑寬，與當年尚未成年的雪梨搞婚外情，並先後誕下兒子徐偉棟和女兒徐頴堃；再例如周星馳搵他拍《武狀元蘇乞兒》報恩。
在《武狀元蘇乞兒》中，徐少強飾演大奸角「趙無極」，身懷絕世武功的他野心極大想做皇帝，可是最後卻被周星馳演的「蘇燦」用絕招「降龍十八掌」第十八式「殺龍有悔」打到人體爆炸。據講，徐少強當初並不明白對方何解搵他拍這齣電影，因為過去兩人幾乎沒有任何交集。直至30年後，「細龜」黃一山拍抖音片爆料，這個謎團才終於解開：「三十幾年前星爺未紅，但佢好鍾意玩，去disco唱歌跳舞，有時候冇乜錢喺身，徐少強就試過請佢。」徐少強從來未有記住這件「小事」，但周星馳卻對這份恩情刻骨銘心，希望搵機會回報，去到《武狀元蘇乞兒》時劇組需要一位武功高強的大反派，他立即想到徐少強，讓「大俠」光環漸退卻的對方，成功轉型成「御用反派」。
幾件事，就睇到周星馳是一個怎樣的人，以及喜歡怎樣的人：好評不回應，負評不辯駁，分得清楚誰人值得合作值得幫，知道哪些人應該疏遠。可能星爺就是在「混血肥仔」身上睇到些少的自己，所以才決定合作。