朱茵可否不要老？
巴黎奧運曲終人散，生活再次回復常態。半夜沒有體育競賽可睇，黃金時段重新變回劇集世界。
三大免費電視台都安排了新節目出街，TVB的重點一定是《法證先鋒VI：倖存者的救贖》，周一至五八點半播，延續上輯聲勢有黃宗澤、袁偉豪和蔡潔做查案鐵三角。雖然有先睹為快的內地觀眾，投訴劇集感情戲太多，但還是比起隔籬ViuTV同時段播的《烈女朴氏契約結婚傳》吸引。而九點半檔就戰況逆轉，ViuTV《反起跑線聯盟2》就橫睇掂睇都正過TVB外購的《射鵰英雄傳之鐵血丹心》。
《反起跑線聯盟》2022年首播時都算犀利，吸引一班少睇ViuTV的觀眾轉台煲劇，締造出平均收視超過5點的佳績，就算沒有天團MIRROR坐鎮，都勁過好多ViuTV劇集，所以高層決定添食開拍第二季，實在不難理解。要穩穩陣陣地再下一城，最好集齊原班人馬，可是拍攝期撞正主角梁詠琪開個唱，只能夠客串演出，好彩劇組轉個頭就搵到13年未拍過港劇的朱茵為續集孭飛。
朱茵在《反2》中飾演小學一年班班主任冼老師，不但對「七小福」等學生嚴格(合格都要重默！)更對他們家長要求甚高(竟然要家長罰留堂學寫字！)又時時黑口黑面，簡直是一名「惡女搣時」。你以為這樣的朱茵會好乞人憎？又不是，可能是她似足小時候見過的某些老師，又可能劇情呈現到她空虛寂寞凍的一面，更大可能是由細到大都睇慣睇熟她，所以反而覺得好正、好親切，很想對她呼喊一句「快點糟質我」。
所謂「百貨應百客」，都有人覺得這樣的朱茵不太掂檔，更拎出周星馳《西遊記》系列裏的「紫霞仙子」做對比，指她與以前不一樣，眼角有魚尾紋、骨膠原流失等，總之狀態麻麻。相信沒有幾個不認同「紫霞仙子」是朱茵的代表作，當年的她處於巔峰時期，一顰一笑都極級攞命，那幕微笑單眼放電場面，更是名垂千古。
不過，如果你用那時候的朱茵，去抽秤今日的她，的確有點搵嚟講。畢竟前後相隔30年，一代女神也活了半個世紀有多，容顏有少少變改，真是平常不過。最離譜的是，更多人單單覺得她氣質與昔日不同，就認定她塊面有下過「工夫」，聲言「佢一定有打嘢」，完全毫無根據，吹水唔使本。
用這個眼光去睇女明星，任你有幾美若天仙，保養得宜，也會挑出缺點，就算是人類典範柯德莉夏萍，都會被口賤之人批評得體無完膚，明明已經是優雅地老去，照樣被指哪裏打了針，哪兒動了刀。