一連兩屆替馬會為董之英中學足球班教體育新聞入門，自然聊起：「聽過李德能(課程主任)講波未？」反應有點茫然。董之英乃學界皇馬，學生不可能不睇波，一來固因德能近年講少了，二來你懂的，年輕人都上網看YouTube。
直播的話，我反對侵權，卻不得不承認，翻牆太容易。據知，翻到後，世界各地頻道隨機收看(視乎哪條流暢)，語言無得揀，久而久之，新一代球迷養成不靠聽粵語評述。
粵語好處，毋庸贅言。除了李德能有口皆碑，講波佬如張志德、李健和，更是我輩偶像宿將，聽落格外親切，但新一代無感，而且香港收費實在偏貴(相對內地)，漸漸遠離社群。
先別說內地用普通話猶如隔靴搔癢，某些直頭侮辱這專業──搵個蛇精臉低胸網紅霸佔四分一畫面，嬌聲嗲氣只懂嗌「小心啊」「加油啊」，戰況一句唔識講，甚至認唔到球員，一味叫人加她群組，聽得心煩，把鬼火mute咗佢。
最近ViuTV逢周末黃金時間直播一場歐洲賽事(與now同步)，由吾友馬啟仁主講，Keyman生動到肉，本屬一大德政。兩間新免費電視台有播波本錢衝擊收視，換轉以前足夠威脅大台，可惜稍嫌為時已晚，部分觀眾習慣了波唔使講，英雄無用武之地。
ViuTV之選亦未如人意，上週揀播畢爾包對華倫西亞，我認識的小男生同一時段寧願翻牆睇利物浦啦。