星期六之晨往屋苑商場吃早餐，兩食肆並立，一間排長龍，一間拍烏蠅，貪方便光顧後者。
坐定不久，即聞前面卡位女聲大駡：「講極你都唔明，係唔係玩嘢？」聽不到男侍應怎回應，大概反唇相稽吧。師奶喝道：「你竟然鬧我？你叫咩名？我要投訴你！」
未知詳情，但太太低聲問我：「要不要幫幫個男仔？」為甚麼會這樣？原來，當局者迷，任那師奶幾有道理也罷，聲大夾惡，予人反感，觀眾當然鋤強扶弱。有時我們身在其中便不自知，先狼者賤，總之記住斯文為上。
我低聲告訴太太：「幫襯得這間舖頭應該預咗，否則怎會隔籬排長龍、這裏冷清清？」太太深以為然點點頭。男侍應沉不住氣，答道：「我叫ＸＸＸ，你投訴我啦！」師奶怒氣沖沖離開。
太太又問我：「個男仔會不會真被投訴？無咗份工就慘。」我說：「不會啦。這類工種算最低時薪了，東家唔打打西家。在老闆立場，郁吓炒人，再請也是低學歷、易得罪顧客的後生仔，根本多此一舉。」
我認，我睇事情用和稀泥態度。各有前因，亂世之下，個個想出色就能出色嗎？代價可能奇高。倒不如僱些二流伙計生產二流水準，限米煮限飯，百貨應百客(貪毋須排隊)，員工又心安理得做夠便算，最終自會達致生態平衡。
各行各業，乃至人生，何嘗不得不和稀泥？