誰想MIRROR fan club 解散？

MIRROR嘅Alton個人後援會早前宣布解散，公開嘅原因係無法接受精神折磨。

fans其實好簡單，想見到偶像、想偶像好、想偶像更多人識，為咗咁可以日灑雨淋排隊、捱更抵夜、出錢出力、搞活動做應援，呢啲係好辛苦，但唔會去到「精神折磨」。咁咩嘢會令人「精神折磨」呢？我相信係不被明白，甚至被誤解、被「屈」。

搞活動，大至奧運、世界盃，定小朋友生日會，都一定有人滿意，有人唔滿意。活動名額有限，去唔到班人註定唔開心，即使去到嗰班，幾時搞、喺邊搞、啲錢點用都一定唔會滿足到所有人。而總有小部分fans或扮fans係壞心腸，自己冇得去，就話唔公平，活動要收錢，就話貴，造謠散播，假都變真，呢啲誤解，對搞手來講就係折磨。

呢種咁吃力不討好嘅苦差，fans都仲話為咗偶像頂硬上，我識一班做官方MIRO fan club嘅人，佢哋唔係MIRROR fans，好多亦唔只為份工，咁究竟為咩？佢哋由MIRROR未紅嗰陣已經有幫手搞活動，見到啲fans好開心，見到好多笑容同希望，被感動；所以想令呢樣嘢繼續落去，想搞更多fans活動，令fans嘅生活得到一啲力量。

結果呢？搞親活動唔理內容同成本，都被大字標題批評係「食水深」。好似最近主題樂園fans meet又話係吸血，有報道更話公司一日賺2,000萬，好似主題樂園唔收錢、冇成本咁款。其實我識搞開活動嘅朋友，都唔會話1,680蚊入場係貴，大家都知平時主題公園入場費都要七八百蚊、今次仲有mini concert，又未計現場額外人手同保安，其實唔蝕已經偷笑，聽講上次啟德見面會，網上直播唔收錢已經令公司要倒貼，今次規模大咁多，我都幾替佢哋公司擔心。

搞fan club係想團結，唔排除有部分fans會覺得貴，但我認識嘅真fans主要係擔心抽唔到飛冇得去，嗰啲一秒就批評搞手貪錢同搞得差嘅「留言」，究竟係真fans定只想帶風向嘅自稱fans？又究竟係咩人想打擊有心嘅搞手，想fan club甚至係MIRROR解散？

我相信大部分fans都係善良，而我亦相信這種愛很沉默。希望善良，不被這些喧嘩的壞人打倒。