他們都不是方大同
方大同留下一句：「時間不等人，生活給我們帶來各種轉折和挑戰，但我們應該以優雅的態度走完生命之路。」
樂壇有好多「音樂才子」、「唱作男神」，但方大同對香港樂壇嘅意義係近年獨一無二嘅，「優雅」或者係最精準嘅形容，亦解釋到佢嘅離去令跨界別樂迷都咁傷心，哀悼優雅早逝 。
何謂優雅？
係咪同管弦樂團、舞台劇等crossover嘅人就優雅呢？呢啲只係優越感，真正嘅優雅，反而係最簡單樸素嘅表達。重點唔係唱到幾高音、唔係舞台幾有藝術感，而係無論喺大城市定小鄉村表演，一樣散發真實嘅品味。正如名牌未必及得上簡樸嘅優雅 。
形象好又係咪等於優雅呢？社交媒體當道，好多歌手都會用來做好公關，所以表面形象好可能只係一種化妝，甚至係偽裝，並唔係優雅，只係聰明。優雅係忠於自己、專注作品，相信真心嘅作品會打動觀眾嘅執着，而唔係挖空心思呃觀眾。
怕醜文青又係唔係必然優雅呢？對唔住，呢個只係外形。大把粗聲粗氣但好有修養嘅人，亦有好多斯文敗類 。咁點分辨真假呢？
第一，人不可以貌相，但作品會說話。睇吓佢嘅作品係「誠實」定「計算」嘅：方大同一生人做嘅歌有獨特風格，但每首都有所不同，因為真正專注音樂，就會有豐富嘅創作，作品多變而真實，是為誠實嘅優雅。相反，扮優雅才子嘅人，會不斷出好多歌，但首首其實差不多，無才華亦無心，因為音樂對佢來講只係商業，從來唔誠實做音樂，只係扮做音樂嘅唱作商人 。
第二，專注音樂，對人亦然。方大同嘅優雅，在於專一，重點唔係對象，亦唔只係一生愛一個，而係嗰種「友達以上，戀人未滿」嘅專一。可以同女性做朋友維持一種距離，是近是遠，呢種唔只係專一，亦係尊重。有啲歌手即使唱功一流，但私下下流，即使掩飾到，都不能攀附「優雅」二字。
方大同離去，大家除咗記住佢嘅音樂，仲可以提升自己嘅優雅嘅辨識力，等待下一個優雅出現，我哋能夠真正感受到、分辨到 。