軒公日前突襲The Flame灣仔busking現場。
謂曰︰「做人無公關」下聯大家都知啦！不過近年「關公」(失敗嘅公關策略)似乎多於「公關」，近日難得出現一教材式事例，必定要同大家分享下，主角係娛樂圈內外備受人景仰嘅張敬軒先生。
話說張生早前突然現身樂隊The Flame喺灣仔海濱嘅街頭表演，即成網上熱話，大讚佢貼地，又覺得佢微服出巡、低調現身全為提攜新人。但同時有人暗寸張生「低調？佢邊一日低調過」，形容張生「騎劫」演出；亦有人覺得成件事，無論「做咩事，喺邊度出現，請咩嘉賓」都係「機關算盡」，質疑成件事唔只係音樂騷，仲係公關騷。之後當然引來一班粉絲反駁、維護偶像。而過咗幾日，其中一個批評過張生嘅人態度180度轉變，公開為自己失言致歉，仲大讚張生心存厚道。
不足一星期，可以將風波轉危為機，仲化敵為友，大團圓結局。我視為公關教材，原因有三︰
一) 街頭表演樂隊先獲鮮在香港樂壇露面嘅謝霆鋒親覆留言，再有張敬軒本尊現身夾歌，唔少網民都覺得擺明係夾埋、有劇本、谷人氣。但大家似乎都接受呢個係娛樂圈嘅操作，冇嫌條橋老套。
二) 批評者當日針對張生嘅帖文一出，大量歌迷湧入留言，炮轟佢借偶像刷流量，唔少留言都甚有火藥味。呢啲情況比著其他藝人嘅粉絲咁做，好易就被人話有黑粉攻擊、網上欺凌，但今次就冇人話。
三) 張生連日只叫過粉絲唔好勞氣，本來以為事件已完，原來佢打俾批評者講咗兩個鐘頭電話，動之以情。而批評者亦唔係聽完收火就算，而係將成件事公開，立即道歉、由彈變讚。呢種浪子回頭嘅大團圓結局，以及張生嘅形象又提升到另一層次，皆屬難得。
近年張生都位列廣告銷售額榜首，商業價值同影響力都比年輕藝人強，可見做好公關都真係搵到食。亦都因為利益當前，靠經營自己形象已經唔夠，近年圈中更常見嘅係黑公關，靠抹黑對手谷自己上位。但願娛樂圈多啲公關高手，少啲打手。