無論叫《BIOHAZARD》定《Resident Evil》，香港人都係叫「BIO」最親切嘅第8集BIO不知不覺已經推出，全球4日就已經賣出300萬套，以恐怖類遊戲嚟講真係跑贏大市。自1996年首作推出開始，恐怖生存類遊戲正式成為遊戲界一個類型，遊戲企畫的三上真司亦因此成為業界紅人。可惜由於佢當年錯判市場，接連喺任天堂GameCube推出獨佔續作，唔止令BIO呢個品牌一度陷入危機，亦令自己最終被完全退出呢個系列，後來甚至因為呢件事離開CAPCOM。佢最後負責嘅《BIO4》係系列首次轉型，而呢個舉動其實都引入咗保險機制，由於系列主角本身算係Chris，但4代開始由Leon成為主角，並同時改革遊戲系統同玩法。如果衰咗，可以用返Chris人氣；贏咗，又可以將系列帶入新時代，呢個模式同樣用喺上集《BIO7》，新主角Ethan Winters加上第一身視覺，遊戲亦比初代更有生存感。諗返轉頭，每次BIO大改革，似乎都必先經歷批評後才大成功，如同今集《BIO8》大賣一樣，冇咗當年三上嘅《BIO5》(佢甚至批評過呢集完全唔掂)，甚至成為當時系列銷量最高嘅作品㖭。