九七年尾，民主派究竟應唔應該去選港區人大呢？當時有兩種講法。主流係漢賊不兩立。民主派去選，訊息好差。當時的說法係，立法局冇直通車，中資報章日日打民主派，基哥等去做臨立會議員，即刻畀支持者鬧到黐肺，依家民主派仲去選人大，一邊同北京鬧翻，一邊又去投共，搞咩呀？
非主流聲音就覺得，港人參與國家事務，理所當然。香港政黨唔應該畀北方強國有個感覺，係民主派人士同強國切割，只睇自己，不理國家。參選人大畀上面知道民主派係關心國家事務，當然，出得去選，預咗做炮灰。
後者當然唔係主流聲音。我嘅演繹係，就好似新馬合併成馬來西亞之後，唔通馬拉國叫新加坡人民行動黨唔准去馬來西亞聯邦參選咩？當然，民主派後來去參選港區人大，北方如臨大敵，又呢樣又那樣，將民主派嘅參選人打下來，呢啲係後話。
去到今屆，民主派參選人大嘅人士，除咗獨立參選的騏哥，擺明唔認真之外，真係「好認真」去選嘅，都係素人。而且，主流嘅民主派政黨，一個代表都冇。睇落去，北方應該好happy，因為已經唔使用盡手上的輿論機器，日日去唱衰對手。但諗深一層，有一樣嘢係觀察得到：民主派的本土化，已經完成咗。
民主派的主流兼比較老式的一代，係華叔嗰代人經常掛在咀邊嘅，愛國不愛黨之民族主義論述。即係點都好，到底都係中國人嘛。即係民族主義將大家的血脈相連，呢家嘢，係自然流露嘛。民主派有人咁唔鍾意個執政黨係一回事，但中國係未應該強大呢？中國人民係未應該享有民主呢？答案當然係yes啦。響咁嘅背景下，呢班前輩覺得，即使點唔鍾意呢個政黨，到底參選人大參與國家大事，都係表達意見嘅一種，咁當然可以趁呢個機會去重申，平反六四，修改中國憲法導言，開放民主選舉等政綱啦。
即係，佢地點唔鍾意一黨專政，都可以借此機會表達對國家發展的意見，都係香港同強國，仲有一條線連在一起。
好啦，二十年後的今天，呢班前輩好多仲響度，但係各政黨已經有咗世代更替。領導層更替之後，新領導層已經對呢樣嘢冇興趣去參與。上屆呢？仲有民主派去參選，不過係二、三線人物。依家直情冇晒，係好事定壞事呢？
當然，有人會話好事，因為少咗人去搞場，費事煩。但係，如果咁樣，係代表緊一個趨向，即係新一代人已經冇心去同北京對話呢？係唔係連一條香港同北京嘅線都整斷，唔想同上面有任何關係同接觸，理都費事呢？上面有識之士，見到呢個趨勢，應該高興定憂心呢？
我估佢地會覺得冇所謂！反正依家係新時代嘛，你剪斷條線，後果自負！哈哈！