我都幫過吓一個辦學團體搞私立大學（香港叫自資院校），好明白辦學之困難。只能夠講，每個學生三皮嘢一年，聊勝於無，好過冇啦。
點解咁講？香港八間公辦大學，間間都行政人員膨脹，行政費高，自然就成本高。上次有講過，香港嘅大學老師人工，已經唔係世界前列，中游咁啦，加上研究經費麻麻地，外地知名學者都唔肯過嚟等因素，但點講都好，高教通脹，係一定高過社會通脹。就係咁，香港私立大學，成本壓力相當大。
依家搞私立大學，學生單位成本，即係比照公家辦學再砍三分之一（當私校行政成本控制做得好），點都要十幾皮。而且，私校仲要大興土木，起呢樣嗰樣，整好硬件，同樣係要錢。政府呢方面有幫忙，但都係貸款畀自資院校，將來都要還畀政府。響成本壓力，學費又唔能夠太貴，又要符合學歷評審局之要求，加加埋埋，真係好鬼貴。要慳水，只有響幾方面入手咯。一係，老師人工方面如果減唔到，咪做多啲嘢咯，行政人員方面，減少幾個咯，長者退休學者，請啲做招牌咯。一係，就響課程入手，盡量平衡多啲業界需要，但係又唔會成本太高的課程，嗰啲要用實驗室又科研幾百萬整一劑嘅生化嘢咪唔好搞咯。舉例，係人都知，人口老化，香港醫護，唔單只護士，係整個醫護界都需要人手，點解自資院校唔多搞？大哥，開拔費好貴㗎！
仲有一樣嘢，就係強國學生問題。當初好多人以為，如果自資可以多收上面學生，拉上補下，咁樣本地學生唔夠唔緊要，上面可以頂上。點知過去五年，呢個吳得掂，除咗去旅行，呢樣嘢都爭取唔到，於是死火啦，上面學生唔能夠一車一車咁落香港讀自資，咁即係點呢？
所以今次政府畀三皮嘢學生，變相係減輕咗自資院校嘅壓力，好明顯係想幫助過往五年水深火熱嘅私立大學，等佢地冇咁辛苦。但從來辦學都係要錢，響香港呢個制度下，公辦大學集中晒全港嘅高教資源，自資真係好難辦。大學係好唔同嘅行業。全世界斷估除咗某啲封閉性之國家外，大學呢個行業，係直接面對全球化之壓力。一個如果畀得五十萬學費之家庭，讓仔女可以選大學進修的話，全球大把學校揀。而且，大學行業唔係fast fashion，冇得速食，唔可以今年班三十個名師，下年就會變哈佛，branding方面係要靠口碑累積，三、五十年係基本，香港係彈丸之地，先天上冇軍工業又冇化工業等其他政府直接插手推動之行業，自資院校之經營，相當困難。
下一步政府可以做乜嘢幫自資院校？同北方教育部傾下，開放北方學生南來讀書，雖然難度極大，但李腳掌當年做到，點解依家唔得？