早前獲邀請去雲頂夢號體驗佢哋嘅海上啤酒節，除咗德國傳統美食同啤酒火鍋之外，仲有一系列同勁飲啤酒有關嘅活動。你可能會問：飲完啤酒醉醺醺仲要喺隻船度搖來搖去，仲唔嘔到反胃？喂！你估天星小輪咩？郵輪真係好定好穩陣，其實除咗收唔到電話之外，完全唔覺得喺海上面搖晃不定。
Any肥，雲頂夢號都算係佢哋集團其中一隻大型嘅郵輪，所以娛樂同餐飲都非常豐富，船上嘅免費餐廳基本上喺正常晚飯時間都會排長龍，所以建議大家都係食個early dinner罷啦！老實地說，佢哋有好多餐廳選擇，唔食佢個免費自助餐完全唔係損失(畫公仔唔使畫出腸了)。加上餐廳消費唔係特別貴，完全affordable，建議大家上到船都係試吓其他餐廳。郵輪上除咗游泳池，亦有水上滑梯、攀石牆、繩索、舞台表演同戲院等免費設施，開頭都好擔心會排長龍兼人山人海一樣都玩唔到，睇嚟我嘅擔心又係多餘，船上啲Uncle Auntie基本上一日24小時都沉醉五光十色嘅賭博世界(慈母上身：見好就收，唔好沉迷)，除咗食飯之外都好少蒲頭，所以年輕一輩好似我哋咁，可以盡情享用娛樂設施！