先望望美帝艾奧瓦州。美民主黨正進行初選。美民主黨係需要一場選戰來凝聚士氣。不過呢，基層黨員究竟應該選邊個打侵侵，似乎同黨內精英有好大差距。本來呢，精英鍾意嘅拜登(上圖)，想響初選之前打贏桑德斯(下圖)，跟手咪印印腳去艾奧瓦參加初選，但艾奧瓦選民素來變幻莫測，依家黨員投票結果未卜，唔知幾時可以公開結果。唔係嘛，黨員投票咗咁多日子，都冇辦法點完選票？咁奇怪？原因係初選結果，好大機會對拜登不利。既然係咁，唔hold住公布選舉結果，萬一拜登輸咗成條街，怎麼辦？
難怪侵侵咁開心，因為佢基本上食硬拜登。佢更加需要迫拜登出嚟選，咁樣先至可以增加勝算。所以，佢依家利用唔同場合，講一啲刺激民主黨嘅說法，激化民主黨裡面嘅矛盾，令更多民主黨黨員支持桑德斯。一來一回，票源走失，拜登唔認輸都唔得。咁嘅屎橋，work唔work，好快就知了。
依家係仇恨政治打贏進步力量嘅年代，但仇恨政治要成功開動，最大嘅助力就係進步力量造成咗嘅流弊，連進步力量都冇法處理。以前進步力量支持成立歐盟，因為可以做到統合又多元，包容又整合，但結果就係有新嘅官僚架構生咗出嚟，多元敵不過龐大的官僚管制，反而歐盟政客想推動嘅價值，就俾官僚阻住晒。當然，一個比較make sense嘅想法係官僚體系改革，重現返嗰啲多元價值，但係邊有咁易㗎？咁樣，就種下咗仇恨政治嘅種子，搞到走極右路線玩仇恨政治嘅政黨贏晒。英國保守黨首相波叔成功借此連任，認真得戚，因為佢終於成功將英國脫歐，而且仲係有極大民意基礎下脫歐，開晒香檳。
不過，英帝同歐盟仲有好多手尾要跟，其中一個就係貿易制度嘅新安排。依家傳聞，西班牙政府會將貿易談判同直布羅陀嘅主權問題掛鈎 ，即係如果英帝唔去「歸還」直布羅陀俾西班牙，果啲關於互相減免關稅嘅嘢就冇得傾。有人話，依家先至係脫歐痛苦期嘅開始。
美英忙緊搞政治，但係武肺已經響亞洲地區總爆發，搞到唔少國家限制北方大國嘅遊客，連港人都受到波及。但係，疫情點會同政治無關呢？依家台灣同香港嘅口罩之亂都係政治問題啦。
English Choi都係借台人撤僑搞政治。原本係台商撤離武漢，English Choi點唔鍾意都要搞，但係北方大國唔喜歡English Choi。自English Choi上台以後，兩岸一直都冇正式交往。北京初頭唔肯制。咁於是藍營出手安排，好明顯係北方大國想益藍營，點知呢？第一次包機就唔知點解整多三個乘客出來，仲要有一個係確診者。依家台方借勢話，藍營台商搞到亂晒大龍，不如兩岸官方傾，飛起藍營啦？如果事成，咁就真係疫情迫成官方接觸，北京真係俾藍營玩死。