本來覺得用呢個位寫中伏餐廳好似好衰咁，但味道嘅嘢真係好主觀，我覺得難食話唔定又有啲人覺得好正呢！(頭盔mode)話說某一晚放工後去咗某間以蜆鍋聞名嘅火鍋店，當年一開，鋪天蓋地嘅宣傳，吸引咗一大班人去排隊試新嘢。我成日都話，人氣唔代表好食。今次又引證咗呢句說話。
蜆鍋湯底就係清水、蒜、蔥同辣椒，心諗：咁樣應該食到蜆嘅鮮甜喇啩？坐咗半個鐘，啲蜆的確係打開晒口，但個鍋一直都未滾起過。先問員工A，佢話個爐壞咗，但滿座，冇爐換；FINE！過咗陣再問員工B，佢話因為個冷氣開咗就會吹走個火，所以唔滾。的確，一閂冷氣，個火就滾。喂！但三十幾度，唔係要閂冷氣打邊爐啊嘛？隔籬枱都反晒白眼喎。於是我就食咗餐個爐從未滾起過嘅火鍋。講番個鍋先，蜆冇味嘅，啖湯當然清水咁啦，難食指數有10粒星爆星。至於啲配菜，響鈴有陣油膉味；魚勁腥唔新鮮；牛肉好似香口膠咁；手打肉丸一樣又淡又腍身，一啲都唔彈牙。我實在食唔落去，埋單走人。返屋企再煮咗個出前一丁先夠飽。
喂，其實咁，會唔會本身好好食，我嗰日唔好彩先至「咁啱」全部嘢都中晒伏，難食到咁呢？
